ബീഹാര്‍ നിയമസഭാ തിരഞ്ഞെടുപ്പില്‍ ബി.ജെ.പിയെ പ്രധാനമന്ത്രി നരേന്ദ്രമോദി നയിക്കുമ്പോള്‍, മുതിര്‍ന്ന നേതാക്കളായ എല്‍.കെ.അദ്വാനി, മുരളീമനോഹര്‍ ജോഷി എന്നിവരെ ഒഴിവാക്കി. മുഖ്യമന്ത്രി നിതീഷ് കുമാറിന് അനുകൂലമായ പ്രസ്താവനകള്‍ ഇറക്കിയ നടനും പാര്‍ട്ടി എം.പിയുമായ ശത്രുഘ്‌നന്‍ സിന്‍ഹയും 40 അംഗ പ്രചാരകരുടെ ആദ്യ ലിസ്റ്റില്‍ ഇല്ല.
പ്രചാരണ രംഗത്ത് നിന്ന് മൂവരെയും ഒഴിവാക്കുന്നത് ആദ്യമാണ്. കഴിഞ്ഞ ഹരിയാന, ഡല്‍ഹി, മഹാരാഷ്ട്ര നിയമസഭാ തിരഞ്ഞെടുപ്പുകളിലും അദ്വാനിയെയും ജോഷിയെയും കാര്യമായി പരിഗണിച്ചിരുന്നില്ല. ബീഹാറില്‍ പ്രചാരകരുടെ രണ്ടാമത്തെ പട്ടികയില്‍ ഇവരെ ഉള്‍പ്പെടുത്തുമോ എന്ന് വ്യക്തമല്ല.
ബി.ജെ.പി ദേശീയ അദ്ധ്യക്ഷന്‍ അമിത് ഷാ, മന്ത്രിമാരായ രാജ്‌നാഥ് സിംഗ്, സുഷമ സ്വരാജ്, അരുണ്‍ ജെയ്റ്റ്‌ലി, രാധാമോഹന്‍ സിംഗ്, രാജീവ് പ്രതാപ് റൂഡി, ഗിരിരാജ് സിംഗ്, മനോഹര്‍ പരിക്കര്‍, ആനന്ത്കുമാര്‍, ധര്‍മ്മേന്ദ്ര പ്രധാന്‍, സയിദ് ഷാനവാസ് ഹുസൈന്‍ തുടങ്ങിയവരും സംസ്ഥാനത്തെ മുതിര്‍ന്ന നേതാക്കളും ലിസ്റ്റിലുണ്ട്.
ഒക്ടോബര്‍ 12ന് ഒന്നാംഘട്ട വോട്ടെടുപ്പിന് മുന്‍പ് ഒരു ഡസന്‍ പരിവര്‍ത്തന്‍ റാലികളില്‍ കൂടി മോദി പങ്കെടുക്കും. തിരഞ്ഞെടുപ്പ് പ്രഖ്യാപിക്കും മുന്‍പ് തന്നെ മുസാഫര്‍പൂര്‍, ഗയ, സഹര്‍സ, ഭാഗല്‍പൂര്‍ എന്നിവിടങ്ങളില്‍ മോദി റാലികള്‍ നടത്തിയിരുന്നു. ബി.ജെ.പിയുടെ നേട്ടങ്ങളും വാഗ്ദാനങ്ങളും പ്രചരിപ്പിക്കാന്‍ ജി.പി.എസ് ഘടിപ്പിച്ച 160 രഥങ്ങളും ഗ്രാമങ്ങളില്‍ കറങ്ങുന്നുണ്ട്.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha