ജൈന ഉത്സവമായ പര്യൂഷണ്‍ പര്‍വയോടനുബന്ധിച്ച് ഏര്‍പ്പെടുത്തിയ മാംസ നിരോധനത്തിത്തെ ശക്തമായ ഭാഷയില്‍ വിമര്‍ശിച്ച് ശിവസേന രംഗത്ത്. ജൈനന്മാര്‍ മുസ്ലീങ്ങളുടെ പാത പിന്തുടര്‍ന്ന് മതഭ്രാന്തന്മാരാകരുത്. മുസ്ലീങ്ങള്‍ക്ക് പോകാന്‍ പാകിസ്ഥാനെങ്കിലുമുണ്ട്. ജൈനന്മാര്‍ എങ്ങോട്ട് പോകുമെന്ന് സേന ചേദിച്ചു. പാര്‍ട്ടി മുഖപത്രമായ സാമ്‌നയിലൂടെയാണ് സേന തങ്ങളുടെ അഭിപ്രായം വ്യക്തമാക്കിയത്.പര്യൂഷണ്‍ പര്‍വോടനുബന്ധിച്ച് എട്ട് ദിവസം ജൈന മതസ്ഥര്‍ പ്രാര്‍ത്ഥനയും ഉപവാസവും ആചരിക്കും. ഇതേ തുടര്‍ന്നാണ് സംസ്ഥാനത്ത് അധികൃതര്‍ നാല് ദിവസത്തേക്ക് മാംസം നിരോധിച്ചത്.

സെപ്തംബര്‍ 10, 13, 17, 18 എന്നീ ദിവസങ്ങളില്‍ മാംസക്കടകള്‍ അടച്ചിടണമെന്നും അന്നേ ദിവസം വില്‍പ്പന പാടില്ലെന്നുമാണ് ഉത്തരവ്. കഴിഞ്ഞ വര്‍ഷവും ഇത്തരത്തിലുള്ള നിര്‍ദ്ദേശം നല്‍കിയിരുന്നു. ഈ സമയത്ത് ഹിംസ പാടില്ലെന്ന വിശ്വമൈത്രി ട്രസ്റ്റിലെ അഹിംസ സംഘിന്റെ അപേക്ഷയെ തുടര്‍ന്നാണ് നിരോധനം. ജൈന ഉത്സവത്തോടനുബന്ധിച്ച് ധാരാളം ജൈന സന്യാസിമാര്‍ പട്ടണത്തിലെത്തുമെന്നും അത് പരിഗണിച്ച് ചടങ്ങുകളുമായി സഹകരിക്കണമെന്നുമായിരുന്നു അപേക്ഷ. അഹിംസയെപ്പറ്റിയുള്ള ജൈനന്മാരുടെ വാദത്തെ സേന പരിഹസിച്ചു.

ലഷ്‌ക്കറെ തയിബ ഭീകരന്‍ അജ്മല്‍ കസബ് പോലൊരു ഭീകരന്‍ ഈ സമയത്ത് ഇവിടെ കയറിപ്പറ്റിയില്‍ ജയിനന്മാര്‍ അയാളെ സംരക്ഷിക്കുമോ അതോ തന്റെ ജീവന്‍ വാഗ്ദാനം ചെയ്യുമോ?. ഹിംസ എന്നത് മൃഗങ്ങളെ കൊല്ലുന്നത് മാത്രമല്ലെന്നും സേന പറഞ്ഞു. പട്ടണത്തിലെ കെട്ടിട നിര്‍മാതാക്കളില്‍ പലരും ജൈനന്മാരാണ്. ഫ്‌ലാറ്റ് വാങ്ങുന്നവരില്‍ നിന്നും കള്ളപ്പണം വാങ്ങുന്നതില്‍ അവര്‍ക്ക് യാതൊരു മനസാക്ഷിക്കുത്തും ഇല്ല. കള്ളപ്പണം സ്വീകരിക്കുന്നത് പാപമാണ്. ഹിംസയുടെ മറ്റൊരു വകഭേദമാണത്. പര്യൂഷണ്‍ സമയത്ത് അവര്‍ കള്ളപ്പണം വാങ്ങുന്നത് നിര്‍ത്തുമോ എന്നും സേന ചോദിച്ചു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha