അപ്രതീക്ഷിത തീരുമാനത്തിലൂടെ റിസര്‍വ് ബാങ്ക് റിപ്പോ നിരക്ക് അര ശതമാനം കുറച്ചു. ബാങ്കുകള്‍ക്കു വായ്പ നല്‍കുമ്പോള്‍ ഈടാക്കുന്ന പലിശയായ റിപ്പോ നാലര വര്‍ഷത്തെ ഏറ്റവും കുറഞ്ഞ നിരക്കിലെത്തി, 6.75 ശതമാനം.ഈ വര്‍ഷം നാലു തവണയായി റിപ്പോ നിരക്കില്‍ 1.25 ശതമാനത്തിന്റെ കുറവാണു വരുത്തിയത്. റിവേഴ്‌സ് റിപ്പോ നിരക്ക് 5.75 ശതമാനമാണ്. കരുതല്‍ ധനാനുപാതത്തില്‍ മാറ്റമില്ല.
റിസര്‍വ് ബാങ്ക് നയത്തിന്റെ ആനുകൂല്യം ബാങ്കുകള്‍ ഉപയോക്താക്കള്‍ക്കു കൈമാറിത്തുടങ്ങി. ഇതോടെ ഭവന, വാഹന, വ്യക്തിഗത വായ്പാ പലിശ കുറയും. എസ്.ബി.യെുടെ അടിസ്ഥാന നിരക്കില്‍ ഒക്‌ടോബര്‍ അഞ്ചു മുതല്‍ 0.4 ശതമാനം കുറയും. 9.3 ശതമാനമാകും പുതിയ നിരക്ക്. ആന്ധ്രാ ബാങ്ക് 0.25 ശതമാനം കുറച്ചു. അവരുടെ പുതിയ നിരക്ക് പ്രാബല്യത്തിലായി.
ബാങ്ക് ഓഫ് ഇന്ത്യ 0.25 ശതമാനം വായ്പാ പലിശനിരക്ക് കുറച്ചു. നിക്ഷേപത്തിന്റെ പലിശയിലും മാറ്റമുണ്ടാകും. വായ്പാ നിരക്കില്‍ ഐ.സി.ഐ.സി.ഐ. ബാങ്കിന്റെ തീരുമാനം ഉടനുണ്ടാകും.
പണപ്പെരുപ്പം നിയന്ത്രണ വിധേയമായതും ഉല്‍പാദന മേഖലയിലെ തളര്‍ച്ചയുമാണു നിരക്കു കുറയ്ക്കാന്‍ പ്രേരിപ്പിച്ചത്. ധനമന്ത്രാലയത്തിന്റെ ഭാഗത്തുനിന്നും സമ്മര്‍ദമുണ്ടായി.
റിപ്പോ നിരക്ക് ഇളവിന്റെ ആനുകൂല്യം സമ്പദ്‌വ്യവസ്ഥയിലേക്കു കൈമാറുന്നുണ്ടെന്ന് ഉറപ്പാക്കുമെന്നും 2017 മാര്‍ച്ചില്‍ പണപ്പെരുപ്പം അഞ്ചു ശതമാനത്തിനടുത്ത് എത്തിക്കുമെന്നു റിസര്‍വ് ബാങ്ക് ഗവര്‍ണര്‍ രഘുറാം രാജന്‍ പറഞ്ഞു.
കഴിഞ്ഞ ജൂണില്‍ റിപ്പോ 7.50 ശതമാനത്തില്‍ നിന്ന് 7.25 ശതമാനമാക്കിയെങ്കിലും അതിന്റെ ഗുണം ബാങ്ക് ഇടപാടുകാരിലേക്ക് എത്തിച്ചില്ലെന്ന വിമര്‍ശനവും അദ്ദേഹം ഉന്നയിച്ചു.
വളര്‍ച്ചാ നിരക്കില്‍ കുറവുണ്ടായതാണു പെട്ടെന്നുള്ള തീരുമാനത്തിനു പിന്നിലെന്നു വിദഗ്ധര്‍ ചൂണ്ടിക്കാട്ടുന്നൂ. ഇന്ത്യയുടെ മൊത്ത ആഭ്യന്തര ഉത്പാദനം (ജി.ഡി.പി.) ജൂണില്‍ ഏഴു ശതമാനത്തിലേക്കു താഴ്ന്നു. 201516 വര്‍ഷത്തെ ജി.ഡി.പി. ലക്ഷ്യം എട്ടു ശതമാനമാണ്.
ചൈനയിലെ വളര്‍ച്ച കുറഞ്ഞതു രാജ്യത്തെ ബാധിക്കാതിരിക്കാന്‍ നിരക്കു കുറയ്ക്കണമെന്ന ആവശ്യം വ്യവസായ ലോകത്തുനിന്നും ഉയര്‍ന്നിരുന്നു. ഒമ്പതു വര്‍ഷത്തിനിടെ ആദ്യമായി യു.എസ്. ഫെഡറല്‍ റിസര്‍വ് പ്രഖ്യാപിച്ച പലിശ വര്‍ധന വൈകിപ്പിക്കുന്നതും അനുകൂല ഘടകമായി വിലയിരുത്തുന്നു. സ്ഥിരതയുള്ള വളര്‍ച്ചയ്ക്കു വേണ്ടി ഘടനാപരമായ പരിഷ്‌കാരങ്ങളും ഉയര്‍ന്ന ഉല്‍പാദനക്ഷമതയും ആവശ്യമാണെന്നും രഘുറാം രാജന്‍ പറഞ്ഞു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha