2002ലെ മുംബൈ വാഹനാപകടക്കേസില്‍ ചലച്ചിത്ര താരം സല്‍മാന്‍ഖാന്റെ വിധി ബോംബെ ഹൈക്കോടതി റദ്ദാക്കി. കേസില്‍ സല്‍മാന്‍ ഖാന്‍ കുറ്റക്കാരനല്ലെന്ന് വ്യക്തമാക്കിയാണ് ഹൈക്കോടതി ശിക്ഷ റദ്ദാക്കിയത്. മെയ്യില്‍ കേസ് പരിഗണിച്ച സെഷന്‍സ് കോടതി സല്‍മാന്‍ഖാന് 5 വര്‍ഷം തടവാണ് വിധിച്ചിരുന്നത് ഇതിനെതിരെയാണ് സല്‍മാന്‍ ബോംബെ ഹൈക്കോടതിയെ സമീപിച്ചത്. സംഭവ സമയം സല്‍മാനാണ് വാഹനമോടിച്ചതെന്ന ദൃക്‌സാക്ഷി മൊഴി പൂര്‍ണമായും വിശ്വസിക്കാനാകില്ലെന്ന് ഹര്‍ജി പരിഗണിക്കവേ ബോംബെ ഹൈക്കോടതി നിരീക്ഷിച്ചിരുന്നു. സല്‍മാന്‍ഖാന്റെ സുരക്ഷാ ഭടന്‍ രവീന്ദ്ര പാട്ടീലിന്റെ മൊഴി ഭാഗികമായി മാത്രമേ വിശ്വസിക്കാനാകൂ, പൂര്‍ണ വിശ്വാസത്തിലെടുക്കാവുന്ന സാക്ഷിയല്ല രവീന്ദ്ര പാട്ടീല്‍. മദ്യപിച്ച് വാഹനമോടിച്ച സല്‍മാന്‍ ഖാന്‍ അങ്ങനെ ചെയ്യരുതെന്ന തന്റെ വാക്കുകള്‍ കേള്‍ക്കാന്‍ തയ്യാറായില്ലെന്ന പാട്ടീലിന്റെ മൊഴി പൂര്‍ണമായും കണക്കിലെടുക്കാന്‍ സാധിക്കില്ലെന്നും കോടതി വ്യക്തമാക്കി. 2007 ഒക്ടോബറില്‍ പാട്ടീല്‍ ടിബിയെ തുടര്‍ന്ന് മരണമടഞ്ഞിരുന്നു. 2002 സെപ്റ്റംബര്‍ 28 ന് ബാന്ദ്ര ഹില്‍ റോഡിലെ അമേരിക്കന്‍ ബേക്കറിക്കു മുന്നിലെ നടപ്പാതയില്‍ കിടന്നുറങ്ങിയവര്‍ക്കുമേലാണ് സല്‍മാന്‍ ഖാന്റെ ലാന്‍ഡ് ക്രൂസര്‍ കാര്‍ പാഞ്ഞു കയറിയത്. പുലര്‍ച്ചെ 2.45 നുണ്ടായ അപകടത്തില്‍ നൂറുള്ള ഷെരീഫ് എന്നയാളാണ് കൊല്ലപ്പെട്ടത്. വിധി കേള്‍ക്കാന്‍ സല്‍മാന്‍ഖാന്‍ ഹാജരാകണമെന്ന് കോടതി നിര്‍ദ്ദേശിച്ചിരുന്നു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha