അധോലോക നായകന്‍ ദാവൂദ് ഇബ്രാഹിമില്‍നിന്നു സര്‍ക്കാര്‍ കണ്ടുകെട്ടിയ ഹോട്ടല്‍ മലയാളിയായ മുന്‍ മാധ്യമപ്രവര്‍ത്തകന്‍ എസ്. ബാലകൃഷ്ണന്‍ ലേലത്തില്‍ വാങ്ങി. സിഎസ്ടി റയില്‍വേ സ്‌റ്റേഷനില്‍നിന്നു രണ്ടു കിലോമീറ്റര്‍ അകലെ പക്‌മോഡിയ തെരുവിലെ \'ഡല്‍ഹി സൈക്ക ഹോട്ടല്‍\' 4.28 കോടി രൂപയ്ക്കാണു ബാലകൃഷ്ണന്‍ സ്വന്തമാക്കിയത്. 1.18 കോടിയാണ് അടിസ്ഥാന ലേലവില നിശ്ചയിച്ചിരുന്നത്.

1993ലെ മുംബൈ സ്‌ഫോടനപരമ്പരയ്ക്കു ശേഷം സര്‍ക്കാര്‍ കണ്ടുകെട്ടിയ, ദാവൂദിന്റെ ഏഴു വസ്തുവകകളില്‍ ഒന്നായ ഹോട്ടല്‍ വര്‍ഷങ്ങളായി അടഞ്ഞുകിടക്കുകയാണ്. ദാവൂദിന്റെ കുടുംബ വീട്ടില്‍നിന്നു വിളിപ്പാടകലെയാണിത്. ലേലത്തില്‍ പങ്കെടുക്കുന്നതിന്റെ പേരില്‍ ദാവൂദിന്റെ വലംകയ്യായ ഛോട്ടാ ഷക്കീലിന്റെ ഭീഷണി സന്ദേശം ലഭിച്ചതായി ബാലകൃഷ്ണന്‍ കഴിഞ്ഞയാഴ്ച വെളിപ്പെടുത്തിയിരുന്നു. ലേലത്തില്‍ പങ്കെടുക്കാന്‍ ആവശ്യമായ 30 ലക്ഷം രൂപ ബാലകൃഷ്ണന്‍ കെട്ടിവച്ചിരുന്നു. ബാക്കി തുക ഒരു മാസത്തിനകം അടയ്ക്കണം.

സമൂഹമാധ്യമങ്ങളില്‍ പ്രചാരണം നടത്തി ജനങ്ങളില്‍നിന്നു സംഭാവന ശേഖരിച്ചു പണം കണ്ടെത്താനാണു ബാലകൃഷ്ണന്റെ നീക്കം. \'ദാവൂദിനെ മുംബൈ ഭയപ്പെടുന്നില്ല\' മുംബൈചെമ്ബൂരില്‍ സ്ഥിരതാമസമാക്കിയ എസ്. ബാലകൃഷ്ണന്റെ കുടുംബവേരുകള്‍ പാലക്കാട്ടാണ്. ടൈംസ് ഓഫ് ഇന്ത്യ ചീഫ് ഓഫ് ബ്യൂറോ ആയിരുന്ന ബാലകൃഷ്ണന്‍ പതിറ്റാണ്ടുകളോളം മുംബൈ അധോലോകം, രാഷ്ട്രീയം എന്നിവയുമായി ബന്ധപ്പെട്ട വാര്‍ത്തകളാണു കൈകാര്യം ചെയ്തിരുന്നത്. \'ദാവൂദിനെ മുംബൈക്കാര്‍ ഭയക്കുന്നില്ലെന്നു കൂടി സ്ഥാപിക്കാനാണ് എന്റെ ശ്രമം\' അദ്ദേഹം പറഞ്ഞു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha