ലോകത്തിലെ ആദ്യ ഡെങ്കിപ്പനി പ്രതിരോധമരുന്ന് ഇന്ത്യയില്‍ വിതരണം ചെയ്യാന്‍ ഫ്രഞ്ച് മരുന്ന് കമ്പനി അപേക്ഷ നല്‍കി. ഇക്കൊല്ലം മാത്രം 90,000 ഡെങ്കിപ്പനി ബാധിതരുള്ള രാജ്യത്ത് മരുന്ന് ലഭ്യമാക്കുന്നത് പ്രയോജനപ്രദമാകുമെന്ന് സനോഫി കമ്പനി വക്താവ് അറിയിച്ചു. ഡെങ്ക്‌വാക്‌സിയ എന്ന മരുന്നിന് മെക്‌സിക്കോ ബുധനാഴ്ച അനുമതി നല്‍കിയിരുന്നു. എന്നാല്‍ ഒമ്പതുവയസില്‍ താഴെയുള്ളവരുടെ ഉപയോഗത്തിന് അനുമതി നല്‍കിയിട്ടില്ല.
പ്രാദേശിക ഇന്ത്യന്‍ അധികൃതരുമായി മരുന്നിന് അനുമതി ലഭിക്കാനായി ചര്‍ച്ചയിലാണെന്നാണ് കമ്പനി പറയുന്നത്. ഇന്ത്യയില്‍ നടത്തിയ പഠനവും പുതിയ മരുന്നിന് അനുകൂലമാണെന്നും സനോഫി പാസ്റ്റര്‍ കമ്പനി വക്താവ് അറിയിച്ചു. വ്യത്യസ്ത ലക്ഷണങ്ങളോട് കൂടിയ നാലുതരം ഡെങ്കി വൈറസുകളെയും പ്രതിരോധിക്കാന്‍ മരുന്ന് ഫലപ്രദമാകും. ഇന്ത്യയില്‍ ഡല്‍ഹി, ലുധിയാന,കൊല്‍ക്കത്ത, പൂനെ, ബംഗളൂരു എന്നിവിടങ്ങളിലെ 18-45 പ്രായത്തിലുള്ള ആളുകളിലാണ് മരുന്ന് പരീക്ഷിച്ചിരുന്നത്്.
മരുന്നിന്റെ മൂന്ന് ഡോസുകള്‍ക്ക് ശേഷം ഡെങ്കിക്കെതിരായ ആന്റിബോഡികള്‍ ഉണ്ടാകുന്നുണ്ടെന്നാണ് ഇന്ത്യയിലെ പരീക്ഷണങ്ങള്‍ക്ക് നേതൃത്വം കൊടുത്ത മൗലാന ആസാദ് മെഡിക്കല്‍ കോളേജ് ഡയറക്ടര്‍ ഡോ.എ.പി ദുബെ അഭിപ്രായപ്പെട്ടത്. പരീക്ഷണവുമായി ബന്ധപ്പെട്ട് മരണം സംഭവിച്ചതായോ രോഗം കടുത്തതായോ മറ്റ് പ്രശ്‌നങ്ങളുണ്ടായതായോ റിപ്പോര്‍ട്ടുകളില്ലെന്നും അദ്ദേഹം അറിയിച്ചു.
സ്ഥിരമായ കുത്തിവയ്പ്പ് എന്ന നിലയിലാണോ മരുന്ന് അവതരിപ്പിക്കുകയെന്ന് ഉറപ്പിച്ചശേഷമേ മരുന്നിന്റെ വില തീരുമാനിക്കൂ എന്നാണ് കമ്പനി സൂചിപ്പിക്കുന്നത്. പൊതുവിതരണത്തിനെത്തിക്കുന്ന മരുന്നുകള്‍ കുറഞ്ഞ വിലയ്ക്ക് കൂടുതല്‍ സ്‌റ്റോക്ക് എത്തിക്കുകയാണ് ചെയ്യുന്നത്. ഇതിന് ലോകാരോഗ്യ സംഘടനയുടെ ധനസഹായവുമുണ്ടാകും. പെണ്‍ ഈഡിസ് കൊതുകുകള്‍ കടിക്കുന്നതിലൂടെ പകരുന്ന രോഗം ഇന്ത്യയുടെ പൊതുജനാരോഗ്യത്തിന് ഏറ്റവും വലിയ ഭീഷണിയാണ്.

ഇക്കൊല്ലം നവംബര്‍ 30 വരെ 181 പേരാണ് ഡെങ്കി ബാധിച്ച് മരിച്ചത്. എന്നാല്‍ ഇത് സംബന്ധിച്ച സംഖ്യ ഉയരാനാണ് സാദ്ധ്യത. പനിയ്ക്ക് ചികിത്സയിലുള്ള പലരും ഡെങ്കി തിരിച്ചറിയാനുള്ള പരിശോധനകള്‍ നടത്തിയിട്ടില്ലെന്നതാണ് കാരണം. ഇന്ത്യയില്‍ തന്നെ ഏറ്റവും കൂടുതല്‍ ഡെങ്കിബാധിതരെ കണ്ടെത്തിയത് ഡല്‍ഹിയിലാണ്, 15000 പേര്‍. 38 പേരാണ് ഇവിടെ മരിച്ചത്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha