കൊല്‍ക്കത്തയിലെ കുപ്രസിദ്ധമായ പാര്‍ക്ക് സ്ട്രീറ്റ് കൂട്ട ബലാത്സംഗ കേസില്‍ മൂന്ന് പ്രതികളെ കുറ്റക്കാരായി വിചാരണ കോടതി കണ്ടെത്തി. കുറ്റക്കാരായി കണ്ടെത്തിയവര്‍ക്കുള്ള ശിക്ഷ കോടതി ഇന്ന് പ്രഖ്യാപിയ്ക്കും. 2012 ഫെബ്രുവരി അഞ്ചിന് കൊല്‍ക്കത്ത നഗരത്തിന്റെ ഹൃദയഭാഗമായ പാര്‍ക്ക് സ്ട്രീറ്റിലാണ് കേസിനാസ്പദമായ സംഭവം നടന്നത്.
റുമണ്‍ ഖാന്‍, നാസര്‍ ഖാന്‍, സുമിത് ബജാജ് എന്നിവരെയാണ് കുറ്റക്കാരായി കോടതി കണ്ടെത്തിയത്. കേസിലെ പ്രധാന പ്രതികളായ കാദര്‍ ഖാനും അലിയും ഇപ്പോഴും ഒളിവിലാണ്. കൊല്‍ക്കത്ത അഡീഷണല്‍ സെഷന്‍സ് കോടതി ഇവര്‍ക്ക് മേല്‍ ചുമത്തിയിരിയ്ക്കുന്നത്് ബലാത്സംഗം, ക്രിമിനല്‍ ഗൂഢാലോചന, മനപൂര്‍വമായ ദേഹോപദ്രവമേല്‍പ്പിയ്ക്കല്‍ തുടങ്ങിയ കുറ്റങ്ങളാണ്.
ഇരയായ സൂസറ്റ് ജോര്‍ദ്ദാന്‍ 37 വയസുള്ളപ്പോഴാണ് കൂട്ട ബലാത്സംഗത്തിനിരയായത്. ഇവര്‍ ഈ വര്‍ഷം മാര്‍ച്ചില്‍ എന്‍സെഫലൈറ്റിസ് ബാധിച്ച് മരണത്തിന് കീഴടങ്ങുകയായിരുന്നു. ഇവരെ 2012 ഫെബ്രുവരി അഞ്ചിന് ഒരു നിശാക്ലബിന് മുന്നില്‍ നിന്ന് അക്രമികള്‍ കാറില്‍ തട്ടിക്കൊണ്ടു പോവുകയായിരുന്നു. ഓടുന്ന കാറില്‍ ക്രൂരമായ ലൈംഗിക പീഡനത്തിന് ഇരയാക്കിയ ശേഷം റോഡില്‍ തള്ളുകയും ചെയ്തു.
ഇന്ത്യയില്‍ ബലാത്സംഗത്തിനും ലൈംഗിക പീഡനത്തിനും ഇരയാവുന്നവരുടെ പേരുകള്‍ പുറത്തുവിടാറില്ലെങ്കിലും സൂസറ്റ് ജോര്‍ദ്ദാന്‍ തന്റെ പേര് പുറംലോകമറിയണം എന്ന് ഉറച്ച നിലപാടെടുക്കുകയായിരുന്നു. പലപ്പോഴും പൊതുവേദിയില്‍ പ്രത്യക്ഷപ്പെടുകയും തന്റെ പേര് പുറംലോകമറിയുന്നതില്‍ യാതൊരു ബുദ്ധിമുട്ടുമില്ലെന്ന് വ്യക്തമാക്കുകയും ചെയ്തിരുന്നു. ലൈംഗിക പീഡനത്തിനെതിരായ ശക്തമായ പ്രചാരണങ്ങളുമായി സൂസറ്റ് പിന്നീട് പലപ്പോഴും രംഗത്തെത്തി.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha