ഇന്ത്യയുടെ അഭിമാന ദൗത്യമായ ചന്ദ്രയാന്‍-3ന്റെ ഭാഗമായുള്ള വിക്രം ലാന്‍ഡര്‍ ചന്ദ്രോപരിതലത്തിലെ താപനില അളന്നു... മേല്‍മണ്ണില്‍ ചൂട് 60 ഡിഗ്രിവരെയെന്നും 8 സെന്റിമീറ്റര്‍ ആഴത്തില്‍ മൈനസ് 10 താപനിലയെന്നുമുള്ള നിര്‍ണായകമായ ആദ്യഘട്ട വിവരങ്ങള്‍ പുറത്തുവിട്ട് ഐഎസ്ആര്‍ഒ.

വിവിധ ആഴങ്ങളിലുള്ള താപനില സംബന്ധിച്ച ചാര്‍ട്ട് ഐഎസ്ആര്‍ഒ പുറത്തുവിട്ടു. ഓരോ സെന്റിമീറ്റര്‍ താഴ്ചയിലും ചൂട് കുറയുകയാണെന്ന് ചന്ദ്രയാന്‍3 രേഖപ്പെടുത്തി.

ചന്ദ്രോപരിതലത്തിലെ ദക്ഷിണധ്രുവത്തില്‍ ആദ്യമായാണ് മണ്ണുകുഴിച്ചുള്ള പരീക്ഷണം നടക്കുന്നത്. വിക്രം ലാന്‍ഡറിലെ വിഎസ്എസ്സിയുടെ പേലോഡുകളില്‍ ഒന്നായ ചസ്തെയാണ് (ചന്ദ്രാസ് സര്‍ഫേസ് തെര്‍മോഫിസിക്കല്‍ എക്‌സ്പീരിമെന്റ് ഇവമടഠഋ) താപനില സംബന്ധിച്ച വിവരങ്ങള്‍ പഠിക്കുന്നത്. മേല്‍മണ്ണില്‍ 60 ഡിഗ്രിവരെ ചൂടെന്ന് കണ്ടെത്തിയ പേലോഡ് 8 സെന്റിമീറ്റര്‍ ആഴത്തില്‍ കുഴിച്ച് വിവിധ ഘട്ടങ്ങളിലായുള്ള താപനില പ്രത്യേകം പ്രത്യേകം രേഖപ്പെടുത്തി. ചന്ദ്രന്റെ മണ്ണിലെ താപവിതരണം എങ്ങനെയാണെന്നു മനസ്സിലാക്കുന്നതിനാണ് ഇത്തരത്തിലുള്ള പരീക്ഷണം.
വിവിധ ആഴങ്ങളിലായി നിര്‍ണായക വിവരങ്ങളാണ് പേലോഡ് സെന്‍സറുകള്‍ ശേഖരിച്ചത്. ഈ വിവരങ്ങള്‍ വിലയിരുത്തുകയാണെന്ന് ഐഎസ്ആര്‍ഒ അറിയിച്ചു. ചന്ദ്രനില്‍ അന്തരീക്ഷം ഇല്ലെന്നാണ് ഇതുവരെയുള്ള കണ്ടെത്തല്‍. ഏതെങ്കിലും തരത്തില്‍ അവിടെ അന്തരീക്ഷം നിലനില്‍ക്കുന്നുണ്ടോയെന്ന് ഇലക്ട്രോണ്‍ സാന്ദ്രത പരിശോധിച്ചു മനസ്സിലാക്കുന്നതിനാണ് മറ്റൊരു പേലോഡുമുണ്ട്. റോവറിലെ സ്പെക്ട്രോസ്‌കോപി ഉപയോഗിച്ച് എന്തൊക്കെത്തരം മൂലകങ്ങളുണ്ടെന്ന് കണ്ടെത്തുകയും ചെയ്യും.