പൊട്ടിച്ചിരിച്ച് മോദി... 'ഇന്ത്യ' അരക്കിട്ടുറപ്പിച്ചതിന്റെ പിറ്റേന്ന് തന്നെ ആണിക്കല്ലിളക്കി ഉദയനിധി സ്റ്റാലിന്; സനാതന ധര്മ പരാമര്ശത്തില് 'ഇന്ത്യ'യില് ഭിന്നത; ഉദയനിധിയെ പരസ്യമായി തള്ളിപ്പറഞ്ഞ് മമത, ശിവസേന; സനാതന പരാമര്ശത്തില് രാജ്യ വ്യാപക പ്രതിഷേധമുയരുന്നു
സനാതനത്തെ മാരക രോഗമായി താരതമ്യം ചെയ്ത തമിഴ്നാട് മുഖ്യമന്ത്രി എം കെ സ്റ്റാലിന്റെ മകനും ഡിഎംകെ മന്ത്രിയുമായ ഉദയനിധി സ്റ്റാലിന് തെറ്റിപ്പോയി. സ്വന്തം പാളയത്തില് നിന്നു തന്നെ എതിര്പ്പ് കിട്ടി. ഉദയനിധി സ്റ്റാലിന്റെ സനാതന ധര്മ്മവുമായി ബന്ധപ്പെട്ട പരാമര്ശം രാജ്യത്തെ പ്രതിപക്ഷ പാര്ട്ടികളുടെ മുന്നണിയായ 'ഇന്ത്യ'യിലും ഭിന്നത സൃഷ്ടിച്ചിരിക്കുകയാണ്.
വിഷയം ദേശീയ തലത്തില് ചര്ച്ചയായതോടെയാണ് ഉദയനിധി സ്റ്റാലിനെ തള്ളി ബംഗാള് മുഖ്യമന്ത്രി മമത ബാനര്ജിയടക്കം രംഗത്തെത്തിയത്. ഓരോ മത വിഭാഗത്തിനും അവരുടേതായ വൈകാരികതലം ഉണ്ടാകുമെന്നും ഒരു വിഭാഗത്തെയും വേദനിപ്പിക്കുന്ന വിഷയങ്ങളില് ഇടപെടരുതെന്നുമായിരുന്നു വിവാദത്തില് മമതയുടെ പ്രതികരണം. രാഷ്ട്രീയത്തില് ഉദയനിധി ജൂനിയറായതിനാല് ഇക്കാര്യങ്ങളില് അറിവുണ്ടാകില്ല. ഏത് സാഹചര്യത്തിലാണ് സനാതന ധര്മവുമായി ബന്ധപ്പെട്ട് വിവാദ പരാമര്ശം ഉണ്ടായതെന്ന് അറിയില്ല. എന്നിരുന്നാലും എല്ലാ മതത്തെയും ബഹുമാനിക്കേണ്ടതുണ്ടെന്നും സനാതന ധര്മ്മത്തെ താന് ബഹുമാനിക്കുന്നുവെന്നും മമത ബാനര്ജി വിശദീകരിച്ചു. സ്റ്റാലിനോടും ദക്ഷിണേന്ത്യയോടും തനിക്ക് ബഹുമാനമാണെന്നും മമത കൂട്ടിച്ചേര്ത്തു.
ഉദയനിധിയുടെ പരാമര്ശത്തെ പരസ്യമായി തള്ളിപ്പറഞ്ഞ് 'ഇന്ത്യ' മുന്നണിയുടെ ഭാഗമായ ശിവസേന ഉദ്ദവ് വിഭാഗവും രംഗത്തെത്തി. സനാതന ധര്മ്മത്തെ അപമാനിക്കും വിധമുള്ള പരാമര്ശങ്ങള് അജ്ഞത മൂലമെന്നാണ് ശിവസേന ഉദ്ദവ് വിഭാഗം അഭിപ്രായപ്പെട്ടത്. രാജ്യത്തിന്റെ അടിസ്ഥാനം സനാതന ധര്മ്മവുമായി ബന്ധിക്കപ്പെട്ടിരിക്കുന്നുവെന്നും ശിവസേന ഉദ്ദവ് വിഭാഗം നേതാവ് പ്രിയങ്ക ചതുര്വേദി കൂട്ടിച്ചേര്ത്തു.
എന്നാല് ഉദയനിധിയുടെ സനാതന ധര്മ്മ പരാമര്ശത്തെ രാഷ്ട്രീയ ആയുധമാക്കുന്ന ബിജെപിക്കെതിരെ സമാജ്വാദി പാര്ട്ടി രംഗത്തെത്തി. സനാതനയെന്ന വാക്ക് ബിജെപി പ്രചാരണത്തിന് ഉപയോഗിക്കുന്നുവെന്ന് സമാജ്വാദി പാര്ട്ടി നേതാവ് സ്വാമി പ്രസാദ് മൗര്യ അഭിപ്രായപ്പെട്ടു. ഉത്തര്പ്രദേശിലെ പിന്നാക്ക വിഭാഗം എസ് പി നേതാവാണ് സ്വാമി പ്രസാദ് മൗര്യ.
സനാതന ധര്മ്മ പരാമര്ശത്തിനെതിരെ വിമര്ശനം കടുപ്പിക്കുയാണ് ബിജെപി. സനാതന ധര്മ്മത്തെ അവഹേളിക്കുന്നത് പ്രതിപക്ഷ സഖ്യത്തിന്റെ നയമായോ എന്ന ചോദ്യമാണ് ബി ജെ പി ഉയര്ത്തുന്നത്. വിഷയത്തില് രാഹുല് ഗാന്ധി നിലപാട് വ്യക്തമാക്കണമെന്ന് ബിജെപി കേന്ദ്രനേതൃത്വവും ആവശ്യപ്പെട്ടു. സര്വധര്മ്മ സമഭാവനയാണ് കോണ്ഗ്രസ് നിലപാടെന്നായിരുന്നു വിഷയത്തില് എഐസിസി പ്രതികരണം.
സനാതന ധര്മ്മ പരാമര്ശത്തില് തമിഴ്നാട് മുഖ്യമന്ത്രി സ്റ്റാലിന്റെ മകനും മന്ത്രിയും നടനുമായ ഉദയനിധി സ്റ്റാലിനെതിരെ പ്രകോപനപരമായ ആഹ്വാനവുമായി അയോദ്ധ്യയിലെ സന്യാസി ജഗദ്ഗുരു പരമഹംസ ആചാര്യ. പ്രതീകാത്മകമായി മന്ത്രിയുടെ ചിത്രം വെട്ടുന്ന വീഡിയോയും പങ്കുവെച്ചു.
ശനിയാഴ്ച ചെന്നൈയില് നടന്ന സമ്മേളനത്തിലായിരുന്നു ഉദയനിധിയുടെ വിവാദത്തിലായ പരാമര്ശം. 'ചില കാര്യങ്ങള് എതിര്ക്കാനാവില്ല. അതിനെ ഉന്മൂലനം ചെയ്യണം. നമുക്ക് ഡെങ്കിപ്പനി, മലേറിയ, കോവിഡ് എന്നിവയെ എതിര്ക്കാനാവില്ല. നിര്മാര്ജനം ചെയ്യാനേ കഴിയൂ. അങ്ങനെ തന്നെയാണ് സനാതനവും. അതിനെ എതിര്ക്കുന്നതില് ഉപരിയായി നിര്മാര്ജനം ചെയ്യുകയാണ് വേണ്ടതെന്നായിരുന്നു ഉദയനിധിയുടെ പരാമര്ശം. ജാതിവെറിക്ക് ഇരയായ രോഹിത് വെമുലയുടെ അമ്മയെ ഉള്പ്പെടെ വേദിയിലിരുത്തിയായിരുന്നു ഉദയനിധിയുടെ പരാമര്ശം.
സനാതന ധര്മ്മം ഉന്മൂലനം ചെയ്യപ്പെടേണ്ടതെന്ന ഉയനിധി സ്റ്റാലിന്റെ പരാമര്ശം സാമുദായിക സംഘര്ഷവും മതസ്പര്ധയും ലക്ഷ്യം വച്ചെന്ന ആരോപണമാണ് ബിജെപിയും തീവ്രഹിന്ദുത്വ സംഘടനകളും ഉയര്ത്തുന്നത്. പരാമര്ശത്തില്, മന്ത്രി ഉദയനിധിസ്റ്റാലിനെ പ്രോസിക്യൂട്ട് ചെയ്യാന് അനുമതി തേടി ബിജെപി ഗവര്ണറെ സമീപിച്ചു. എക്സ് പ്ലാറ്റ്ഫോമില് ആര്എസ്എസ് അനുകൂല അഭിഭാഷക സംഘടന പങ്കുവച്ച കത്തിന്റെ പകര്പ്പിന് താഴെ ചിരിക്കുന്ന ഇമോജി ഉദയനിധി മറുപടിയായി നല്കി പരിഹസിച്ചതും ബിജെപിയെ ചൊടിപ്പിച്ചു.
https://www.facebook.com/Malayalivartha
