മധ്യപ്രദേശില്‍ നടന്ന തദ്ദേശ സ്ഥാപനങ്ങളിലേക്കുള്ള ഉപ തിരഞ്ഞെടുപ്പുഫലങ്ങള്‍ ബിജെപിക്ക് തിരിച്ചടി. എട്ടിടത്തു നടന്ന തിരഞ്ഞെടുപ്പില്‍ അഞ്ചിലും ബിജെപിയെ തോല്‍പിച്ച് കോണ്‍ഗ്രസ് നേട്ടമുണ്ടാക്കി. രത്‌ലാം ലോക്‌സഭാ സീറ്റ് കഴിഞ്ഞ മാസം നടന്ന ഉപതിരഞ്ഞെടുപ്പില്‍ ബിജെപിയില്‍നിന്ന് കോണ്‍ഗ്രസ് പിടിച്ചെടുത്തിരുന്നു. അതിന്റെ തുടര്‍ച്ചയാണ് ഡിസംബര്‍ 22ന് തദ്ദേശ സ്ഥാപനങ്ങളിലേക്ക് നടന്ന തിരഞ്ഞെടുപ്പിലും കണ്ടത്. അഞ്ച് മുന്‍സിപ്പല്‍ കൗണ്‍സിലുകളാണ് കോണ്‍ഗ്രസ് തിരിച്ചുപിടിച്ചത്.
എന്നാല്‍, നഗരങ്ങള്‍ ഇപ്പോഴും ബിജെപിക്ക് ഒപ്പമാണ്. എട്ട് കോര്‍പറേഷനുകളില്‍ ഏഴിടത്തും ബിജെപി അധികാരം നിലനിര്‍ത്തി. ഭേരാഘട്ട് കോണ്‍ഗ്രസ്സും നിലനിര്‍ത്തി. കഴിഞ്ഞവര്‍ഷം നടന്ന തിരഞ്ഞെടുപ്പില്‍ തദ്ദേശ സ്ഥാപനങ്ങളില്‍ ഏറെക്കുറെ പൂര്‍ണമായി ബിജെപി അധികാരത്തിലേറിയിരുന്നു. 135 കോര്‍പറേഷനുകളില്‍ 83ഇടത്തും ബിജെപിയാണ് വിജയിച്ചത്.
ബിജെപിയുടെ നല്ലകാലം അസ്തമിച്ചുവെന്ന് കോണ്‍ഗ്രസ് വക്താവ് കെ.കെ.മിശ്ര പറഞ്ഞു. ബീഹാറില്‍ത്തുടങ്ങിയതാണ് അവര്‍ക്കുള്ള തിരിച്ചടി. ഗുജറാത്തിലെ തദ്ദേശ തിരഞ്ഞെടുപ്പിലും അതാവര്‍ത്തിച്ചു. രത്‌ലം ലോക്‌സഭാ സീറ്റ് കൈവിട്ടു.ഇപ്പോള്‍ തദ്ദേശ സ്ഥാപനങ്ങളിലേക്കുള്ള ഉപതിരഞ്ഞടുപ്പിലും ബിജെപിക്ക് തിരിച്ചടിയേറ്റു. പാഴായ വാഗ്ദാനങ്ങളില്‍ ജനങ്ങളുടെ മനസ്സുമടുത്തുവെന്നതിന് തെളിവാണിതെന്ന് അദ്ദേഹം പറഞ്ഞു.
എന്നാല്‍, ഈ തിരിച്ചടിയില്‍ ആശങ്കപ്പെടേണ്ടതില്ലെന്ന നിലപാടിലാണ് ബിജെപി സംസ്ഥാന പ്രസിഡന്റ് നന്ദകുമാര്‍ സിങ് ചൗഹാന്‍. എന്നാല്‍, പാര്‍ട്ടി നേതൃത്വം അത്ര അനായാസമായല്ല ഇതിനെ കാണുന്നതെന്ന് സ്പഷ്ടമാണ്. ഗ്രാമപ്രദേശങ്ങളിലും ചെറു പട്ടണങ്ങളിലും മുഖ്യമന്ത്രി നേരിട്ടിറങ്ങി പ്രചാരണം നടത്തിയിട്ടും തിരിച്ചടി നേരിട്ടത് അവരെ അലോസരപ്പെടുത്തുന്നുണ്ട്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha