ആ പ്രതീക്ഷയും മങ്ങി, നിമിഷയുടെ മോചനത്തിനായി യെമനിലേക്ക് തിരിക്കാൻ അമ്മ പ്രേമകുമാരിക്ക് തൽക്കാലം അനുമതിയില്ല, തീരുമാനം പുനഃപരിശോധിക്കണമെന്ന് ആവശ്യപ്പെട്ട് നിമിഷപ്രിയയുടെ അമ്മയ്ക്ക് കേന്ദ്ര വിദേശകാര്യ മന്ത്രാലയം കത്ത് നല്കി
യെമന് ജയിലില് വധശിക്ഷ കാത്ത് കഴിയുന്ന മലയാളി നഴ്സ് നിമിഷ പ്രിയയുടെ മോചനത്തിന് തത്ക്കാലം യെമനിലേക്ക് പോകാൻ അമ്മ പ്രേമകുമാരിക്ക് അനുമതി നൽകാതെ കേന്ദ്ര വിദേശകാര്യ മന്ത്രാലയം. നിമിഷയുടെ മോചനത്തിന് വേണ്ടി ശ്രമിക്കാനായി നേരിട്ട് യെമനിലേക്ക് പോകണമെന്ന അമ്മയുടെ ആവശ്യം പുനഃപരിശോധിക്കണമെന്ന് വിദേശകാര്യ മന്ത്രാലയം ആവശ്യപ്പെട്ടു. ഇത് വ്യക്തമാക്കികൊണ്ട് നിമിഷപ്രിയയുടെ അമ്മയ്ക്ക് കേന്ദ്ര വിദേശകാര്യ മന്ത്രാലയം കത്ത് നല്കി.
നിലവിൽ നിമിഷപ്രിയയുടെ കുടുംബം യെമെന് സന്ദര്ശിച്ചാല് അവിടുത്തെ സൗകര്യങ്ങള് ഒരുക്കാന് സര്ക്കാരിന് സാധിക്കില്ലെന്ന് വിദേശകാര്യ മന്ത്രാലയത്തിലെ ഡയറക്ടര് തനുജ് ശങ്കര്, പ്രേമകുമാരിക്ക് കൈമാറിയ കത്തില് വ്യക്തമാക്കിയിട്ടുണ്ട്. യെമെനിലെ ആഭ്യന്തര സാഹചര്യങ്ങള് കാരണം എംബസി ജിബുട്ടിയിലേക്ക് മാറ്റിയിരിക്കുകയാണ്. സനയിലെ സര്ക്കാരുമായി നിലവില് ഔപചാരിക ബന്ധങ്ങള് ഇല്ല. എന്നാല് നിമിഷപ്രിയയുടെ കേസില് സാധ്യമായ നടപടികള് എല്ലാം ചെയ്യുന്നുണ്ടെന്നും കേന്ദ്രം പ്രേമകുമാരിക്ക് കൈമാറിയ കത്തില് വിശദീകരിച്ചിട്ടുണ്ട്.
ശരിയത്ത് നിയമ പ്രകാരമുളള 'ബ്ലഡ് മണി' കൊല്ലപ്പെട്ട തലാല് അബ്ദുമഹ്ദിന്റെ കുടുംബം സ്വീകരിച്ചാല് ശിക്ഷയില് ഇളവ് ലഭിക്കാന് സാധ്യത ഉണ്ടെന്നാണ് നിമിഷപ്രിയയുടെ കുടുംബത്തിന്റെ വാദം. ഈ ചര്ച്ചകള്ക്കായി നിമിഷപ്രിയയുടെ അമ്മ പ്രേമകുമാരിയും, മകള് മിഷേല് ടോമി തോമസും യെമന് സന്ദര്ശിക്കാനുള്ള അനുമതി തേടിയാണ് കേന്ദ്രത്തിന് കത്ത് നല്കിയത്.
https://www.facebook.com/Malayalivartha
