പാര്‍ലമെന്റ് പാസാക്കിയ ദേശീയ ഭക്ഷ്യസുരക്ഷാ നിയമം നടപ്പാക്കാത്ത ഗുജറാത്ത് സര്‍ക്കാരിനും കേന്ദ്രസര്‍ക്കാരിനും സുപ്രീംകോടതിയുടെ രൂക്ഷവിമര്‍ശം. ഗുജറാത്ത് ഇന്ത്യയുടെ ഭാഗമല്ലേയെന്നും മറ്റു സംസ്ഥാനങ്ങളെ അപേക്ഷിച്ച് എന്തെങ്കിലും പ്രത്യേകതയുണ്ടെന്ന് ഗുജറാത്ത് സര്‍ക്കാര്‍ ചിന്തിക്കുന്നുണ്ടോയെന്നും ജസ്റ്റിസുമാരായ മദന്‍ ബി ലോക്കൂറും ആര്‍ കെ അഗര്‍വാളും ആരാഞ്ഞു.
ഗുജറാത്തിന് ഇന്ത്യയില്‍നിന്നു വേര്‍പിരിയണമെന്ന് ആഗ്രഹമുണ്ടോ? പാര്‍ലമെന്റ് പാസാക്കിയ നിയമം നടപ്പാക്കില്ലെന്ന് ഏതെങ്കിലും സംസ്ഥാനത്തിനു തീരുമാനമെടുക്കാനാകുമോ? കേന്ദ്രത്തിന് ഈ വിഷയത്തില്‍ എന്ത് പറയാനുണ്ട് സോളിസിറ്റര്‍ ജനറല്‍ രഞ്ജിത്കുമാറിനോട് കോടതി ചോദിച്ചു.
ഭക്ഷ്യസുരക്ഷാനിയമം നടപ്പാക്കുന്നത് സജീവപരിഗണനയിലുണ്ടെന്ന് ഗുജറാത്ത് സര്‍ക്കാരിനു വേണ്ടി ഹാജരായ അഭിഭാഷക അറിയിച്ചപ്പോള്‍, ഇത് വളരെ മോശം നടപടിയാണെന്ന് ബെഞ്ച് കുറ്റപ്പെടുത്തി. നാളെ മറ്റു സംസ്ഥാനങ്ങളും പാര്‍ലമെന്റ് പാസാക്കിയ നിയമങ്ങള്‍ നടപ്പാക്കില്ലെന്ന് വാശിപിടിക്കും. മുഴുവന്‍ രാജ്യത്തിനുംവേണ്ടിയാണ് നിയമം പാസാക്കിയത്. എന്നാല്‍, തങ്ങള്‍ക്ക് എന്തോ പ്രത്യേകതയുണ്ടെന്ന ഭാവത്തിലാണ് ഗുജറാത്തിന്റെ പെരുമാറ്റം. ഈ വിഷയത്തില്‍ പാര്‍ലമെന്റിന് എന്ത് പറയാനുണ്ട്? നിങ്ങളൊക്കെ എന്തൊക്കെ ചെയ്തുകൂട്ടുന്നുവെന്ന് ഊഹിക്കാന്‍ പോലും സാധിക്കുന്നില്ല ബെഞ്ച് വിമര്‍ശം തുടര്‍ന്നു.
ഭക്ഷ്യസുരക്ഷയും തൊഴിലുറപ്പും കുടിവെള്ളപദ്ധതികളും ഉള്‍പ്പെടെയുള്ള ജനക്ഷേമപദ്ധതികള്‍ നടപ്പാക്കുന്നതില്‍ വിവിധ സംസ്ഥാനസര്‍ക്കാരുകള്‍ വീഴ്ച കാണിക്കുന്നുണ്ടെന്ന് ചൂണ്ടിക്കാണിച്ച് സര്‍ക്കാരിതര സംഘടനയായ കോമണ്‍കോസ് സമര്‍പ്പിച്ച പൊതുതാല്‍പ്പര്യഹര്‍ജിയിലാണ് സുപ്രീംകോടതി ഇടപെടല്‍. നിയമം പാസാക്കേണ്ടതില്ലെന്ന് തീരുമാനിക്കാന്‍ സംസ്ഥാനങ്ങള്‍ക്ക് അധികാരമുണ്ടോയെന്ന് വ്യക്തമാക്കുന്ന സത്യവാങ്മൂലം 12നകം സമര്‍പ്പിക്കണം കോടതി ഉത്തരവിട്ടു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha