ബംഗളൂരുവില്‍ ടാന്‍സാനിയന്‍ യുവതിയെ നഗ്‌നയാക്കി തെരുവിലൂടെ നടത്തിക്കുകയും ഒപ്പമുണ്ടായിരുന്നവരെ മര്‍ദ്ദിക്കുകയും ചെയ്ത സംഭവത്തില്‍ നാലുപേരെ പോലീസ് അറസ്റ്റ് ചെയ്തു. അക്രമത്തിനിരയായ യുവതിയുടെ മൊഴി രേഖപ്പെടുത്തിയ ശേഷം നാലു പേര്‍ക്കെതിരേയും ക്രിമിനല്‍ കേസെടുത്തിട്ടുണ്ട്.

ഞായറാഴ്ച രാത്രിയാണ് ഹെസരഘട്ട റോഡില്‍ രാജ്യത്തെ അന്താരാഷ്ട്ര തലത്തില്‍ അപമാനിച്ച സംഭവം അരങ്ങേറിയത്. സുഡാന്‍ സ്വദേശിയുടെ കാറിടിച്ച് 35-കാരി മരിച്ചതിനെ തുടര്‍ന്ന് അക്രമാസക്തരായ ആള്‍ക്കൂട്ടം അല്‍പം കഴിഞ്ഞ് അതുവഴി വന്ന ടാന്‍സാനിയന്‍ വിദ്യാര്‍ത്ഥികളുടെ കാര്‍ ആക്രമിക്കുകയായിരുന്നു. കാറിലുണ്ടായിരുന്ന യുവതികളില്‍ ഒരാളെ വലിച്ചിറക്കിയ ശേഷം വസ്ത്രം വലിച്ചുകീറി തെരുവിലൂടെ നടത്തുകയായിരുന്നു.

സാമൂഹ്യമാദ്ധ്യമങ്ങളില്‍ പ്രതിഷേധം ശക്തമായതോടെ സംഭവത്തില്‍ ആശങ്കയും വേദനയും പ്രകടിപ്പിച്ച് വിദേശകാര്യ മന്ത്രി സുഷമാ സ്വരാജിന്റെ ട്വീറ്റ് വന്നു. കുറ്റവാളികളില്‍ നാലുപേരെ അറസ്റ്റ് ചെയ്‌തെന്നും ക്രിമിനല്‍ കേസെടുത്തെന്നും കര്‍ണ്ണാടക മുഖ്യമന്ത്രി അറിയിച്ചതായി അവര്‍ പറഞ്ഞു. ഇവര്‍ക്കെതിരെ കര്‍ശന നടപടി സ്വീകരിക്കണമെന്നും വിദേശ വിദ്യാര്‍ത്ഥികളുടെ സുരക്ഷയും സംരക്ഷണവും ഉറപ്പുവരുത്തണമെന്നും അദ്ദേഹത്തോട് ആവശ്യപ്പെട്ടെന്നും സുഷമ പറഞ്ഞു.

ഞായറാഴ്ചത്തെ സംഭവത്തില്‍ ആഫ്രിക്കന്‍ എംബസികള്‍ നടുക്കമറിയിച്ചെന്ന് ബംഗളൂരുവിലെ ആഫ്രിക്കന്‍ വിദ്യാര്‍ത്ഥികളുടെ നിയമോപദേശകനായ ബോസ്‌കോ കവീസി അറിയിച്ചു. സംഭവത്തെക്കുറിച്ചുള്ള വിശദ റിപ്പോര്‍ട്ട് നല്‍കാന്‍ വിദ്യാര്‍ത്ഥി നേതാക്കളോട് ടാന്‍സാനിയന്‍ എംബസി ആവശ്യപ്പെട്ടിട്ടുണ്ട്.

ആചാര്യ കോളേജിലെ വിദ്യാര്‍ത്ഥികളായ രണ്ട് പെണ്‍കുട്ടികളികളുള്‍പ്പെട്ട അഞ്ചംഗ ടാന്‍സാനിയന്‍ സംഘത്തെയാണ് അക്രമാസക്തമായ ആള്‍ക്കൂട്ടം ആക്രമിച്ചത്. സഞ്ചരിച്ച കാര്‍ അഗ്‌നിക്കിരയാക്കിയതോടെ പാസ്‌പോര്‍ട്ടുകളും എ.ടി.എം കാര്‍ഡുകളും പണവും ഫോണുകളും ഉള്‍പ്പെടെ വിലപ്പെട്ടതെല്ലാം നഷ്ടപ്പെട്ടു. ആശുപത്രി ബില്ലുപോലും എങ്ങനെ അടയ്ക്കുമെന്ന ആശങ്കയിലാണ് വിദ്യാര്‍ത്ഥികള്‍. വീട്ടില്‍ വിവരമറിയിക്കാന്‍ ഫോണുകള്‍ പോലും അവരുടെ കൈവശമില്ല ബോസ്‌കോ പറയുന്നു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha