ഡല്‍ഹി മുഖ്യമന്ത്രി അരവിന്ദ് കേജ്‌രിവാളിന് സുമിത് അഗര്‍വാളെന്ന വ്യവസായിയുടെ വക 364 രൂപ സമ്മാനം. വിശേഷാവസരങ്ങളില്‍ ധരിക്കാനുതകുന്ന നല്ല ഒരു ജോഡി ഷൂ വാങ്ങാനാവശ്യപ്പെട്ടാണ് വ്യവസായി ഈ തുക അയച്ചുകൊടുത്തത്. റിപ്പബ്ലിക് ദിനാഘോഷങ്ങളുടെ ഭാഗമായി ഇന്ത്യയിലെത്തിയ ഫ്രഞ്ച് പ്രസിഡന്റ് ഫ്രാന്‍സ്വ ഒലോന്‍ദിനായി രാഷ്ട്രപതി ഭവനില്‍ ഒരുക്കിയ വിരുന്നില്‍ പങ്കെടുക്കവെ കേജ്‌രിവാള്‍ ധരിച്ച ചെരുപ്പാണ് അഗര്‍വാളിന്റെ 'ചങ്ക് തകര്‍ത്തത്'.

എല്ലാവരും നല്ല ഷൂസൊക്കെ ധരിച്ച് ചടങ്ങില്‍ പങ്കെടുക്കുമ്പോള്‍ ഒരു 'ആംആദ്മി മോഡല്‍' ചെരുപ്പുമിട്ടാണ് കേജ്‌രിവാള്‍ ചടങ്ങിനെത്തിയത്. ഇതുകണ്ട് 'മനസലിഞ്ഞ' അഗര്‍വാള്‍ ഉടനെ സ്വന്തം കൈയില്‍നിന്നും 49 രൂപയും മറ്റുള്ളവരില്‍ നിന്നും പിരിച്ച ചെറിയ തുകകളും ചേര്‍ത്ത് 364 രൂപ ഡിമാന്‍ഡ് ഡ്രാഫ്റ്റായി ഡല്‍ഹിക്ക് അയച്ചുകൊടുത്തു, കൂടെയൊരു കത്തും. ഇത്തരമൊരു ചടങ്ങില്‍ പങ്കെടുക്കുമ്പോള്‍ പാലിക്കേണ്ട ചിട്ടവട്ടങ്ങള്‍ കേജ്‌രിവാളിനെ ഓര്‍മപ്പെടുത്തിക്കൊണ്ടുള്ളതാണ് കത്ത്.

ചെരുപ്പ് വാങ്ങാനുള്ള 364 രൂപ ശേഖരിച്ചതിനെക്കുറിച്ചും അഗര്‍വാള്‍ കത്തില്‍ വിശദമാക്കിയിട്ടുണ്ട്. ഇതു വളരെ ചെറിയൊരു തുകയാണെന്ന് എനിക്കറിയാം. എന്നാല്‍ ഒരു ഞായറാഴ്ച ഉച്ചകഴിഞ്ഞ് മുഴുവന്‍ അധ്വാനിച്ചതിന്റെ പ്രതിഫലമാണിത്. ഇതില്‍ 49 രൂപ എന്റെ പങ്കാണെന്നും ബാക്കി മറ്റുള്ളവരില്‍ നിന്നും പിരിച്ചെടുത്തതാണെന്നും കത്തില്‍ പറയുന്നു. വിദേശ പ്രതിനിധികള്‍ പങ്കെടുക്കുന്ന ചടങ്ങില്‍ ക്ഷണിതാവായി ചെല്ലുമ്പോള്‍ പാലിക്കേണ്ട ചില ചിട്ടവട്ടങ്ങളുണ്ട്.

താങ്കളുടെ അന്തസ്സ് കളയാതിരിക്കാന്‍ ഇവ ശ്രദ്ധിക്കണമെന്നും കത്തില്‍ ആവശ്യപ്പെട്ടിട്ടുണ്ട്. രാഷ്ട്രപതി ഒരുക്കിയ വിരുന്നില്‍ പങ്കെടുക്കാനാണ് താങ്കള്‍ എത്തിയത്. മറിച്ച് റാംലീല മൈതാനത്തോ ജന്തര്‍ മന്തറിലോ നടക്കുന്ന ആംആദ്മി പാര്‍ട്ടിയുടെ ധര്‍ണയില്‍ പങ്കെടുക്കാനല്ല. അനുയോജ്യമായ വസ്ത്രം ധരിക്കുക എന്നത് ഒരാളുടെ വ്യക്തി സ്വാതന്ത്ര്യമാണ്. എന്നാല്‍ ചില സ്ഥലങ്ങളില്‍ സ്വന്തം ഇഷ്ടത്തെക്കാള്‍ ആ ചടങ്ങിന് അനുയോജ്യമായ തരത്തിലാവണം വസ്ത്രധാരണം. താങ്കള്‍ മുതിര്‍ന്നൊരു വ്യക്തിയാണ്. സാഹചര്യത്തിനുസരിച്ച് പെരുമാറാനും സന്ദര്‍ഭത്തിനനുസരിച്ച് വസ്ത്രം ധരിക്കാനും താങ്കള്‍ തയാറാവണം  അഗര്‍വാള്‍ കത്തിലെഴുതി.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha