ഹൈദരാബാദ് കാപ്പു വിഭാഗത്തെ പിന്നോക്ക വിഭാഗത്തില്‍ ഉള്‍പ്പെടുത്തണമെന്ന ആവശ്യത്തില്‍ ആന്ധ്ര സര്‍ക്കാര്‍ പ്രഖ്യാപനങ്ങളൊന്നും നടത്താത്തില്‍ പ്രതിഷേധിച്ച് കാപ്പു നേതാവ് അനിശ്ചിതകാല നിരാഹാര സമരം പ്രഖ്യാപിച്ചു. കാപ്പു ഐക്യ ഗര്‍ജന നേതാവ് മുദ്രഗാഡ പത്മനാഭമാണ് ഇന്നു മുതല്‍ സമരം തുടങ്ങുന്നത്.
രാവിലെ 9ന് സമരം ആരംഭിക്കുമെന്നും കാപ്പു വിഭാഗത്തില്‍പ്പെട്ട എല്ലാവരും അവരരവരുടെ വീടുകളില്‍ നിരാഹാരം അനുഷ്ഠിക്കണം, ആരും കിര്‍ലാംപുടിയില്‍ എത്തരുതെന്നും പത്മനാഭം അറിയിച്ചു. സര്‍ക്കാര്‍ യാതൊരുവിധ ചര്‍ച്ചകള്‍ക്കും തയ്യാറായിട്ടില്ലെന്നും അദ്ദേഹം പറഞ്ഞു. ടുണി റെയില്‍വേ സ്‌റ്റേഷനില്‍ രത്‌നാചല്‍ എക്‌സ്പ്രസ് ട്രെയിനും പ്രദേശത്തെ രണ്ടു പൊലീസ് സ്‌റ്റേഷനുകളും നിരവധി വാഹനങ്ങളും കത്തിക്കാന്‍ കാപ്പു പ്രവര്‍ത്തകരെ പ്രേരിപ്പിച്ചതിനെതിരെയുള്ള 63 കേസുകളില്‍ പ്രധാന പ്രതി പത്മനാഭമാണ്. ആന്ധ്രയുടെ തീരപ്രദേശത്ത് താമസിക്കുന്ന പ്രമുഖ കര്‍ഷക സമൂഹമാണ് കാപ്പു. ഇവരെ പിന്നോക്കവിഭാഗത്തില്‍ ഉള്‍പ്പെടുത്തണം എന്ന ആവശ്യം സര്‍ക്കാര്‍ അംഗീകരിക്കാനായി പത്മനാഭ സംഘടിപ്പിച്ച യോഗത്തില്‍ രണ്ടുലക്ഷത്തോളം പ്രവര്‍ത്തകരാണ് പങ്കെടുത്തത്. ആവശ്യം അംഗീകരിക്കുന്നതുവരെ റോഡുകളും റെയില്‍പാളങ്ങളും തടയാനായിരുന്നു പദ്ധതി.
സെക്ഷന്‍ 144, പൊലീസ് ആക്ട് 30 എന്നിവ സംസ്ഥാനത്തൊട്ടാകെ പ്രാബല്യത്തിലുള്ളതിനാല്‍ കിഴക്കന്‍ ഗോദാവരി എസ്.പി രവി പ്രകാശ് ജനങ്ങളോട് കിര്‍ലാംപുടിയില്‍ പോകരുതെന്ന് ആവശ്യപ്പെട്ടിട്ടുണ്ട്. നാലായിരത്തോളം പൊലീസ് ഉദ്യോഗസ്ഥരെ ജില്ലയിലെ പ്രധാന സ്ഥലങ്ങളുടെ സുരക്ഷയ്ക്കായി, പ്രത്യേകിച്ച് കൊല്‍ക്കത്തചെന്നൈ ഹൈവേ, റെയില്‍വേ ട്രാക്കുകള്‍ എന്നിവിടങ്ങളില്‍ വിന്യസിച്ചിട്ടുണ്ടെന്നും അദ്ദേഹം പറഞ്ഞു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha