ഇന്ത്യന്‍ ട്രക്കുകള്‍ ബാരിക്കേഡുകള്‍ തകര്‍ത്ത് അവശ്യ സാധനങ്ങള്‍ ലഭിക്കാതെ ദുരിതത്തിലായ നേപ്പാളിലേക്ക് കയറി. ഭരണഘടനയില്‍ കാതലായ മാറ്റങ്ങള്‍ ആവശ്യപ്പെട്ട് പ്രതിഷേധിക്കുന്ന മധേശി പാര്‍ട്ടികള്‍ കഴിഞ്ഞ വര്‍ഷം സെപ്തംബര്‍ 23ന് സ്ഥാപിച്ച ബാരിക്കേഡുകളാണ് ബീഹാറിലെ റക്‌സൗളില്‍ നിന്നുള്ള വ്യാപാരികള്‍ തകര്‍ത്തത്. അതിര്‍ത്തിയിലെ മിതേരി പാലത്തിനടുത്ത് ഐക്യ ജനാധിപത്യ മധേശി മുന്നണി(യു.ഡി.എം.എഫ്) ഉയര്‍ത്തിയിരുന്ന കൂടാരങ്ങള്‍ക്ക് തീയിടുകയും ചെയ്തു. പ്രദേശവാസികളുടെ സഹായത്തോടെയാണ് വ്യാപാരികള്‍ ഉപരോധം നീക്കിയത്.
ഉച്ചയ്ക്ക് 1.40ഓടെയാണ് വ്യാപാരികള്‍ ബാരിക്കേഡുകള്‍ നീക്കിയത്. ബിര്‍ഗഞ്ജ് വാസികളും അവരെ സഹായിക്കാന്‍ കൂടി. വൈകുന്നേരം നാലുമണി വരെയുള്ള സമയത്തില്‍ 35 ട്രക്കുകള്‍ നേപ്പാളില്‍ പ്രവേശിച്ചു. ബാരിക്കേഡ് തകര്‍ത്തതറിഞ്ഞ് പ്രക്ഷോഭകര്‍ ഓടിയെത്തിയെങ്കിലും വാഹനങ്ങളെ തടയാന്‍ അവര്‍ക്കായില്ല. നാല് മധേശി പാര്‍ട്ടികളുടെ സംയുക്ത സംഘടനയായ യു.ഡി.എം.എഫ് അതിര്‍ത്തി പുനര്‍നിര്‍ണ്ണയവും ആനുപാതിക പ്രാതിനിധ്യവും ആവശ്യപ്പെട്ട് പ്രക്ഷോഭം തുടരുകയാണ്. നേപ്പാളില്‍ അവശ്യസാധനങ്ങളെത്തിക്കാനുള്ള അന്തര്‍ രാജ്യ പാതകളുള്‍പ്പെടെ ഉപരോധിച്ചാണ് പ്രതിഷേധം തുടരുന്നത്. 70 ശതമാനത്തോളം ഉഭയകക്ഷി വ്യാപാരവും നടക്കുന്ന ബിര്‍ഗഞ്ജ് കൂടി ഉപരോധിച്ചതോടെ നേപ്പാള്‍ കടുത്ത അവശ്യ സാധന ദൗര്‍ലഭ്യം നേരിടുകയാണ്.
കഴിഞ്ഞമാസം ഇന്നത്തേതിന് സമാനമായി അഞ്ച് ട്രക്കുകള്‍ അതിരാവിലെ ബിര്‍ഗഞ്ജ് വഴി നേപ്പാളിലെത്തിയിരുന്നു. പ്രക്ഷോഭകര്‍ സ്ഥലത്തില്ലാതിരുന്ന നേരത്തായിരുന്നു കയറിയത്. എന്നാല്‍ സംഭവമറിഞ്ഞ് സ്ഥലത്തെത്തിയ പ്രക്ഷോഭകര്‍ വീണ്ടും വഴിയടയ്ക്കുകയായിരുന്നു. തുടര്‍ചര്‍ച്ചയെത്തുടര്‍ന്ന് കഴിഞ്ഞമാസം ഭരണഘടനയില്‍ മാറ്റം വരുത്താന്‍ ധാരണയായെങ്കിലും എല്ലാ ആവശ്യങ്ങളും അംഗീകരിക്കാതെ സമരമവസാനിപ്പിക്കില്ലെന്ന നിലപാടില്‍ ഉറച്ചുനില്‍ക്കുകയാണ് മധേശികള്‍. രാജ്യത്തെ മുഴുവന്‍ ജനങ്ങളെയും ബാധിക്കുന്ന പ്രക്ഷോഭം വര്‍ദ്ധിപ്പിക്കുമെന്ന നിലപാട് യു.ഡി.എം.എഫ് പ്രഖ്യാപിച്ചതും ഇതിന് ശേഷമാണ്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha