അന്തസിനു യോജിച്ച എല്ലാ അടിസ്ഥാന സൗകര്യങ്ങളും തടവുകാര്‍ക്കും നല്‍കണമെന്നു കേന്ദ്രസംസ്ഥാന സര്‍ക്കാരുളോട് സുപ്രീംകോടതി. ജാമ്യത്തുക കെട്ടിവയ്ക്കാനില്ലാതെ ജയിലില്‍ കഴിയുന്ന പാവങ്ങളെ വിട്ടയക്കണം. പണമില്ലെന്ന കാരണത്താല്‍ മാത്രം തടവിലിടുന്നതിനോട് യോജിപ്പില്ലെന്നും ജസ്റ്റിസുമാരായ മദന്‍ ബി. ലോക്കൂറും ആര്‍.കെ. അഗര്‍വാളും അടങ്ങുന്ന രണ്ടംഗ ബെഞ്ച് വ്യക്തമാക്കി.
ജാമ്യത്തുക കെട്ടിവയ്ക്കാനില്ലാത്ത തടവുപുള്ളികളെ വിട്ടയച്ചാല്‍ അതു തടവുകാരുടെ അമിത ബാഹുല്യമുള്ള ജയിലുകള്‍ക്കു ഗുണംചെയ്യും. ജയില്‍പ്പുള്ളികളോടുള്ള പെരുമാറ്റം സംബന്ധിച്ച മാര്‍ഗനിര്‍ദേശം പുറപ്പെടുവിക്കുന്നതിനിടെയാണ് കോടതിയുടെ അഭിപ്രായപ്രകടനം. തടവുപുള്ളികള്‍ക്കും അഭിമാനം ഉണ്ടെന്നും അവരോടു മാന്യമായും കരുണയോടെയും പെരുമാറണമെന്നും കോടതി നിര്‍ദേശിച്ചു. തടവുകാര്‍ എല്ലാ വിധത്തിലുള്ള മനുഷ്യാവകാശങ്ങള്‍ക്കും അര്‍ഹരാണ്. അവര്‍ക്ക് അന്തസും അഭിമാനവും ഉണ്ടെന്നും കോടതി വ്യക്തമാക്കി. ജയിലിന്റെ അറ്റകുറ്റപ്പണികള്‍ക്കും മറ്റുമായി സര്‍ക്കാര്‍ അനുവദിക്കുന്ന ഫണ്ടുകള്‍ കൃത്യമായി ഉപയോഗിക്കുന്നുണ്ടോയെന്ന് ജയില്‍ ചുമതലയുള്ള ഡി.ജി.പി. ഉറപ്പുവരുത്തണം. 2013 ഡിസംബര്‍ 31നു പുറത്തുവിട്ട കണക്കു പ്രകാരം രാജ്യത്തെ ജയില്‍ അന്തേവാസികളില്‍ 67.6 ശതമാനവും വിചാരണതടവുകാരാണ്. ഇത് ഒരു കാരണവശാലും അംഗീകരിക്കാന്‍ കഴിയില്ലെന്നും കോടതി വ്യക്തമാക്കി.ദരിദ്രരായ കുറ്റവാളികള്‍ക്കു സൗജന്യ നിയമസഹായം നല്‍കുന്നതിനു കഴിവുള്ള അഭിഭാഷകരെ നല്‍കണമെന്ന് സംസ്ഥാന നിയമ സഹായ അഥോറിറ്റിയോട് കോടതി നിര്‍ദേശിച്ചു.
രാഷ്ട്രീയത്തടവുകാര്‍ അവരുടെ മൊത്തം തടവുകാലയളവിന്റെ പകുതി അനുഭവിച്ചിട്ടുണ്ടെങ്കില്‍ വ്യക്തിഗത ജാമ്യത്തില്‍ വിട്ടയക്കണം. വിചാരണത്തടവുകാര്‍ അവരുടെ ശിക്ഷയുടെ പകുതി അനുഭവിച്ചിട്ടുണ്ടെങ്കില്‍ വിട്ടയക്കാമെന്ന് ഇന്ത്യന്‍ ക്രിമിനല്‍ കുറ്റകൃത്യനിയമത്തില്‍ (436 എ) പറയുന്നുണ്ടെന്നും കോടതി ഓര്‍മിപ്പിച്ചു. ഓരോ മൂന്നുമാസം കൂടുംതോറും രാഷ്ട്രീയത്തടവുകാരെ നിരീക്ഷിക്കുന്ന സമിതി എല്ലാ ജില്ലാ ജയിലുകളിലെയും വിചാരണതടവുകാരെ സന്ദര്‍ശിക്കണമെന്നും കോടതി നിര്‍ദേശിച്ചു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha