റബ്ബര്‍ വിലയിടിവ് തടയാന്‍ ഇറക്കുമതി തീരുവ 25 ശതമാനത്തില്‍ നിന്ന് 40 ശതമാനമാക്കി ഉയര്‍ത്തണമെന്ന് കേരളം. ക്ഷീര മേഖലയിലെ സഹകരണ സംഘങ്ങളെ ആദായ നികുതിയില്‍ നിന്ന് ഒഴിവാക്കണമെന്നും ബജറ്റിന് മുന്നോടിയായുള്ള ധനമന്ത്രിമാരുടെ യോഗത്തില്‍ കേരളം ആവശ്യപ്പെട്ടു. കാര്‍ഷിക മേഖലയിലെ പ്രതിസന്ധി മറികടക്കാന്‍ കൊടുക്കാന്‍ ബജറ്റില്‍ ഊന്നല്‍ വേണമെന്ന് വിവിധ സംസ്ഥാനങ്ങള്‍ ധനമന്ത്രി അരുണ്‍ ജെയ്റ്റ്‌ലിയോട് അഭ്യര്‍ത്ഥിച്ചു.
റബ്ബര്‍ കര്‍ഷകര്‍ക്ക് അടിയന്തര ആശ്വാസം നല്‍കുന്നതിനുള്ള പ്രഖ്യാപനം കേന്ദ്രബജറ്റില്‍ വേണമെന്നാണ് ബജറ്റിനു മുന്നോടിയായി ധനമന്ത്രി അരുണ്‍ ജയ്റ്റ്‌ലി വിളിച്ചുചേര്‍ത്ത യോഗത്തില്‍ കേരളം മുന്നോട്ടുവെച്ച പ്രധാന ആവശ്യം. ഇറക്കുമതി തീരുവ 25ല്‍ നിന്ന് 40 ശതമാനമാക്കി ഉയര്‍ത്തിയാലേ ആഭ്യന്തര വിപണിയില്‍ റബ്ബര്‍വില പിടിച്ചു നിര്‍ത്താനാകൂ എന്ന് സംസ്ഥാനത്തെ പ്രതിനിധീകരിച്ച് യോഗത്തില്‍ പങ്കെടുത്ത പ്ലാനിംഗ് സെക്രട്ടറി അലോക് ഷെയ്ല്‍ ബോധിപ്പിച്ചു. കേന്ദ്രത്തിന്റെയും കേരളത്തിന്റെയും വായ്പാ പരിധിയില്‍ ഉള്ള പൊരുത്തക്കേട് പരിഹരിക്കാന്‍ വായ്പാ പരിധി ഉയര്‍ത്തണം. പ്രതീക്ഷിച്ച സാമ്പത്തിക വളര്‍ച്ച കൈവരിക്കാനാകാത്തതും ശമ്പളക്കമ്മീഷന്‍ ശുപാര്‍ശകള്‍ നടപ്പാക്കേണ്ടതും ഇതിനടിസ്ഥാമായി സംസ്ഥാനം ചൂണ്ടിക്കാണിക്കുന്നു. പൊതുമേഖലാസ്ഥാപനങ്ങള്‍ക്കുള്ള ആദായനികുതി ഇളവുകള്‍ റദ്ദാക്കിയത് പുന:സ്ഥാപിക്കണം, ക്ഷീരമേഖലയിലെ സഹകരണ സൊസൈറ്റികളെ ആദായനികുതിയില്‍ നിന്ന് ഒഴിവാക്കണം, കേന്ദ്രാവിഷ്‌കൃത പദ്ധതികള്‍ നടപ്പാക്കുന്നതില്‍ സംസ്ഥാനങ്ങള്‍ക്ക് കൂടുതല്‍ സ്വാതന്ത്ര്യം നല്‍കണമെന്നും ആവശ്യപ്പെട്ടു. ഇതിനായി മുഖ്യമന്ത്രിമാരുടെ ഉപസമിതി സമര്‍പ്പിച്ച ശുപാര്‍ശകള്‍ നടപ്പാക്കണം.
ബിഹാറും ആന്ധ്രാപ്രദേശും ഉള്‍പ്പെടെയുള്ള സംസ്ഥാനങ്ങള്‍ പ്രത്യേക സാമ്പത്തിക പാക്കേജ് ആവശ്യപ്പെട്ടെങ്കിലും കേന്ദ്രം ഇക്കാര്യം ഉന്നയിച്ചിട്ടില്ല. സംസ്ഥാനങ്ങളുടെ ആവശ്യം അനുഭാവപൂര്‍വ്വം പരിഗണിക്കുമെന്ന് ധനമന്ത്രി അരുണ്‍ ജയ്റ്റ്‌ലി ഉറപ്പു നല്‍കി.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha