2013ലെ നിയമസഭാ കാലയളവില്‍ നിന്നും ആം ആദ്മി പാര്‍ട്ടി 2015ല്‍ എത്തിയപ്പോള്‍ വരുമാനത്തില്‍ 275ശതമാനം വര്‍ധന. 2013ല്‍ വെറും 9.42കോടി സംഭാവനയായി നേടിയ ആം ആദ്മിക്ക് 2015ല്‍ 35.28കോടി രൂപയാണ് ലഭിച്ചത്. അതേസമയം ബിജെപിക്കാകട്ടെ ആം ആദ്മിക്ക് ഇപ്പോള്‍ കിട്ടിയതിന്റെ പതിമൂന്നിരട്ടിയിലേറെ പണം വരുമാനമായി ലഭിച്ചെങ്കിലും രണ്ടുവര്‍ഷത്തിനുള്ളില്‍ ഉണ്ടായിരിക്കുന്ന വരുമാന വളര്‍ച്ച 156 ശതമാനം മാത്രമാണ്.
തെരഞ്ഞെടുപ്പ് കമ്മീഷന്‍ പുറത്തുവിട്ട കണക്കുകളുടെ അടിസ്ഥാനത്തില്‍ ഡല്‍ഹിയിലെ രാഷ്ട്രീയ പാര്‍ട്ടികളുടെ വരുമാന കണക്കുകള്‍ പുറത്തുവിടുന്ന അസോസിയേഷന്‍ ഫോര്‍ നാഷണല്‍ ഡെമോക്രാറ്റിക് റിഫോംസ് എന്ന സംഘടനയാണ് ഈ വിവരങ്ങള്‍ പുറത്തുവിട്ടത്. ഇവര്‍ പുറത്തുവിട്ട കണക്കുകള്‍ പ്രകാരം 2013ലെ ഡല്‍ഹി തെരഞ്ഞെടുപ്പില്‍ ബിജെപിക്ക് 170.86 കോടി രൂപയും, 2015ലെ തെരഞ്ഞെടുപ്പില്‍ 437.35 കോടി രൂപയും സംഭാവനയായി ലഭിച്ചു. മൊത്തത്തില്‍ രണ്ടു തെരഞ്ഞെടുപ്പുകളുമായി ബന്ധപ്പെട്ട് ബിജെപിയുടെ അക്കൗണ്ടിലേക്ക് വന്ന മൊത്തം പണം 608 കോടി രൂപ.
അതേസമയം കോണ്‍ഗ്രസിന് 2013ലെ 59.58 കോടി രൂപയില്‍ നിന്നും സംഭാവനകള്‍ വഴി ലഭിക്കുന്ന വരുമാനം 141.46 കോടി രൂപയില്‍ എത്തിയിട്ടുണ്ട്.ശരത് പവാറിന്റെ എന്‍സിപിക്ക് 52.84 കോടി രൂപ വരുമാനമായി അക്കൗണ്ടില്‍ എത്തിയിട്ടുണ്ട്. അതേസമയം സിപിഐക്കും സിപിഐഎമ്മിനും ആകട്ടെ ഇതുവരെ അഞ്ചുകോടി രൂപപോലും സംഭാവനകളില്‍ നിന്നും നേടാനായിട്ടില്ല. 2013ലും, 2015ലുമായി 1.33കോടി രൂപയാണ് സിപിഐക്ക് ആകെ ലഭിച്ചിരിക്കുന്നത്.
സിപിഐഎമ്മിനാകട്ടെ 2013ല്‍ ലഭിച്ച 2.09കോടിയില്‍ നിന്നും വരുമാനം 3.44കോടിയായി വര്‍ധിച്ചിട്ടുണ്ട്. ജനപ്രാതിനിധ്യ നിയമപ്രകാരം 20000 രൂപയ്ക്ക് മുകളിലുളള സംഭാവനകളുടെ കണക്കുകള്‍ മാത്രം രാഷ്ട്രീയപാര്‍ട്ടികള്‍ സൂക്ഷിച്ചാല്‍ മതി. എന്നാല്‍ ഡല്‍ഹിയില്‍ നിന്നും മഹാരാഷ്ട്രയില്‍ നിന്നും ഏറ്റവുമധികം സംഭാവനകള്‍ ലഭിച്ച ആം ആദ്മിയാകട്ടെ ഒരു രൂപ മുതല്‍ ലഭിച്ച തുകകളുടെ മൊത്തം കണക്കുകളും സമര്‍പ്പിച്ചിരുന്നു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha