ഒമ്പതാംക്ലാസ് വിദ്യാര്ഥി മിഹിര് അഹമ്മദിന്റെ മരണം: ആത്മഹത്യാ പ്രേരണക്കുറ്റം ചുമത്തി എഫ്. ഐ. ആര്
ഗ്ലോബല് പബ്ലിക് സ്കൂളിലെ ഒമ്പതാംക്ലാസ് വിദ്യാര്ഥി മിഹിര് അഹമ്മദിന്റെ മരണത്തില് നടപടിയുമായി പോലീസ്. ആത്മഹത്യാ പ്രേരണക്കുറ്റം ചുമത്തി എഫ്. ഐ. ആര് രജിസ്റ്റര് ചെയ്തു. കേസില് നിലവില് ആരെയും പ്രതിചേര്ത്തിട്ടില്ല. നേരത്തെ അസ്വാഭാവിക മരണത്തിനായിരുന്നു കേസെടുത്തിരുന്നത്. തുടര്ന്ന് സ്കൂള് പ്രിന്സിപ്പലിനെയടക്കം ചോദ്യംചെയ്തതിന് ശേഷമാണ് ആത്മഹത്യാ പ്രേരണാക്കുറ്റം ചുമത്തി കേസെടുത്തത്. ഈ റിപ്പോര്ട്ട് ഉടന് കോടതിയില് സമര്പ്പിക്കും.
ആര്ക്കെതിരേയും കേസെടുത്തില്ലെങ്കിലും ആത്മഹത്യ ചെയ്യാന് തക്കതായുള്ള മാനസികാഘാതം മിഹിറിന് ഉണ്ടായിരുന്നുവെന്നാണ് പോലീസ് കണക്കുകൂട്ടുന്നത്. സ്കൂള് അധികൃതരെയടക്കം വരുംദിവസങ്ങളില് വീണ്ടും ചോദ്യംചെയ്യും.മിഹിര് അഹമ്മദ് ജീവനൊടുക്കിയ സംഭവത്തില് കൊച്ചിയിലെ ജെംസ് മോഡേണ് അക്കാദമി വൈസ് പ്രിന്സിപ്പലിനെ കഴിഞ്ഞദിവസം സസ്പെന്ഡ് ചെയ്തിരുന്നു. ബിനു അസീസിനെയാണ് അന്വേഷണ വിധേയമായി സസ്പെന്ഡ് ചെയ്തത്. മിഹിര് നേരത്തെ പഠിച്ച സ്കൂളിലെ വൈസ് പ്രിന്സിപ്പല് ആയിരുന്നു ബിനു അസീസ്.
കഴിഞ്ഞ മാസം പതിനഞ്ചിനായിരുന്നു ഗ്ലോബല് പബ്ലിക് സ്കൂളിലെ ഒന്പതാം ക്ലാസ് വിദ്യാര്ത്ഥിയും ഇരുമ്പനം സ്വദേശിയുമായ മിഹിര് അഹമ്മദ് താമസ സ്ഥലത്തെ ഫ്ളാറ്റ് സമുച്ചയത്തിന്റെ 26-ാം നിലയില് നിന്ന് ചാടി ജീവനൊടുക്കിയത്. മിഹിര് അതിക്രൂരമായ റാഗിങ്ങിന് ഇരയായിരുന്നുവെന്ന് ചൂണ്ടിക്കാട്ടി മാതാവ് മുഖ്യമന്ത്രിക്കും പൊലീസിലും പരാതി നല്കിയതോടെയാണ് സംഭവം സമൂഹ ശ്രദ്ധനേടിയത്. മിഹിറിന്റെ മരണത്തിന് പിന്നിലെ കാരണം ആദ്യം മനസിലായിരുന്നില്ലെന്നും ഇതേപ്പറ്റി വിശദമായി പരിശോധിച്ചപ്പോഴാണ് കാരണം വ്യക്തമായതെന്നും അമ്മ നല്കിയ പരാതിയില് പറഞ്ഞിരുന്നു.
സംഭത്തില് അനുശോചിച്ച് ലോക്സഭ പ്രതിപക്ഷ നേതാവ് രാഹുല് ഗാന്ധി രംഗത്തെത്തിയിരുന്നു. മിഹിര് റാഗിങ്ങിലൂടെ അനുഭവിച്ചത് ഒരു കുട്ടിക്കും സഹിക്കാന് പറ്റാത്ത കാര്യമാണെന്നും അദ്ദേഹം പറഞ്ഞു. കുട്ടിയുടെ മരണം ഹൃദയഭേദകമെന്നും ഉത്തരവാദികളായവരെയെല്ലാം നിയമത്തിന് മുമ്പില് കൊണ്ടുവരണമെന്നും രാഹുല്ഗാന്ധി എക്സ് പോസ്റ്റില് കുറിച്ചു. 'ആള്ക്കൂട്ട പീഡനത്തെ നിഷ്കളങ്കമായി കാണാന് പറ്റില്ല. ഒരുപക്ഷെ, അത് ജീവന്തന്നെ നഷ്ടപ്പെടുത്തിയേക്കാം. ദയയേക്കുറിച്ചും സ്നേഹത്തേക്കുറിച്ചും സഹാനുഭൂതിയേക്കുറിച്ചുമൊക്കെ രക്ഷിതാക്കള് കുട്ടികളോട് തുറന്ന് സംസാരിക്കണം. മിഹിറിന്റെ മരണത്തില് അഗാധമായ ദുഃഖം രേഖപ്പെടുത്തുന്നു.' രാഹുല്ഗാന്ധി എക്സ് പോസ്റ്റില് പറഞ്ഞു.
https://www.facebook.com/Malayalivartha
