സിവിൽ സർവ്വീസ് പരീക്ഷ ഫലം പ്രഖ്യാപനത്തിന് പിന്നാലെ വിജയികളുടെ സന്തോഷ പ്രകടന മണിക്കൂറുകളാണ് ഇപ്പോൾ. മലയാളികളടക്കം നിരവധി പേരുടെ ഏറെ നാളത്തെ സ്വപ്നം. ശക്തി ദുബെയ്ക്ക് ഒന്നാം റാങ്ക് ലഭിച്ചു. ആദ്യ അൻപത് റാങ്കുകളിൽ  4 മലയാളികളുള്ളതായാണ് പ്രാഥമിക വിവരം. ആദ്യ 100 റാങ്കുകളിൽ 5 മലയാളി വനിതകളും ഉൾപ്പെട്ടിട്ടുണ്ട്.

ആദ്യ അഞ്ചിൽ മൂന്നും വനിതകളാണ്. ആദ്യ രണ്ട് റാങ്കുകളും വനിതകൾക്കാണ്. സിവിൽ സർവീസ് 2024 പരീക്ഷ ഫലമാണ് പ്രസിദ്ധീകരിച്ചത്. വിജയികളായ ഓരോരുത്തരും സന്തോഷം പങ്ക് വച്ച് രം​ഗത്ത് എത്തിക്കൊണ്ടിരിക്കുന്നതേയുള്ളൂ. ഇതിൽ ഇപ്പോൾ സമൂഹമാധ്യമങ്ങളൊന്നടങ്കം തിരഞ്ഞുകൊണ്ടിരിക്കുന്നത് ചെങ്ങന്നൂർ സ്വദേശിയായ മാളവികയ്ക്ക് വേണ്ടിയാണ്.

കാരണം പ്രസവം കഴിഞ്ഞ് 14ാം ദിവസമാണ് സിവിൽ സർവീസ് മെയിൻസ് പരീക്ഷ എഴുതി നേട്ടം കൈവരിച്ച അമ്മയാണ് അവർ. സിവിൽ സർവീസ് പരീക്ഷയുടെ അവസാന അവസരത്തിൽ 45ാം റാങ്ക് നേടിയിരിക്കുകയാണ് മലയാളിയായ മാളവിക ജി നായർ. ചെങ്ങന്നൂർ സ്വദേശിനിയായ മാളവിക 2019-20 ഐആർഎസ് ബാച്ചിൽ ഡെപ്യൂട്ടി കമ്മീഷണറായി ജോലി ചെയ്തുവരുന്നതിനിടെയാണ് സ്വപ്നസാക്ഷാത്കാരമായി സിവിൽ സർവീസ് നേട്ടം.  പരീക്ഷക്ക് ഒരുങ്ങുമ്പോഴും പോയി എഴുതുമ്പോഴുമെല്ലാം വീട്ടുകാർ കുഞ്ഞിനെ നോക്കി വളരെയധികം പിന്തുണ നൽകി.

പലപ്പോഴും പഠിക്കാനൊന്നും സമയം കിട്ടാതിരുന്നപ്പോൾ ഭർത്താവ് ആണ് മോക്ക് ഇൻറർവ്യുവൊക്കെ നടത്തിയത്. ഐഎഎസിനുള്ള അവസാന അവസരമായിരുന്നു. അതിൽ തന്നെ കിട്ടിയതിൽ ഒരുപാട് സന്തോഷമുണ്ടെന്നും മാളവിക പറഞ്ഞു. ഇത്തരത്തിൽ മധുരമൂറുന്ന നിരവധി അനുഭവങ്ങളടക്കം പങ്ക് വച്ച് കൊണ്ടാണ് വിജയികൾ  രം​ഗത്ത് എത്തിക്കൊണ്ടിരിക്കുന്നത്. എന്തായാലും മലയാളികൾക്ക് ഏറെ പ്രധാന്യമുള്ള ഒരു റിസൽറ്റ് തന്നെയാണ് ഇത്തവണ ഉണ്ടായിരിക്കുന്നത്. ആദ്യ 50 ൽ നാല് മലയാളികൾ ആണ് ഉള്ളത്.