പഹല്‍ഗാം ആക്രമണത്തിന് വ്യക്തവും ശക്തവുമായ മറുപടിയുണ്ടാകുമെന്ന് കേന്ദ്രം
പഹല്‍ഗാമില്‍ ഇന്നലെ സാധാരണക്കാര്‍ക്ക് നേരെയുണ്ടായ ഭീകരാക്രമണത്തില്‍ ശക്തമായ മറുപടിയുണ്ടാകുമെന്ന് സൂചിപ്പിച്ച് കേന്ദ്ര പ്രതിരോധ മന്ത്രി രാജ്നാഥ് സിംഗ്. പഹല്‍ഗാം ആക്രമണത്തിന് കാരണക്കാരായവര്‍ക്ക് വ്യക്തവും ശക്തവുമായ മറുപടി ഉടന്‍ നല്‍കുമെന്ന് അദ്ദേഹം വ്യക്തമാക്കി.
ആക്രമണത്തിനിരയായവരുടെ കുടുംബത്തിന് അദ്ദേഹം ഐക്യദാര്‍ഢ്യം പ്രഖ്യാപിച്ചു. 'ഇന്നലെ പഹല്‍ഗാമില്‍ ഭീരുക്കളായ തീവ്രവാദികള്‍ ഒരു പ്രത്യേക മതവിഭാഗത്തിലുള്ളവരെ ലക്ഷ്യമിട്ട് ആക്രമണം നടത്തി. അതില്‍ നമുക്ക് നിരവധി നിഷ്‌കളങ്കരായ ജീവനുകള്‍ നഷ്ടമായി. രാജ്യത്തെ ഓരോ ജനങ്ങളെയും അറിയിക്കുന്നു, സര്‍ക്കാര്‍ ഇതിനെതിരെ വേണ്ട നടപടി കൈക്കൊള്ളും.' രാജ്നാഥ് സിംഗ് പറഞ്ഞു.
ആക്രമണം നടത്തിയവര്‍ മാത്രമല്ല അതിന് പിന്നിലുള്ളവരെയും കണ്ടെത്തുമെന്നും വ്യക്തവും ശക്തവുമായ മറുപടി നല്‍കുമെന്നും അദ്ദേഹം പറഞ്ഞു. ഭീകരതയ്ക്കെതിരായ ഇന്ത്യയുടെ ദൃഢനിശ്ചയത്തോടെയുള്ള പോരാട്ടം ഉണ്ടാകും. പ്രതിരോധ മന്ത്രി വ്യക്തമാക്കി.
ഭീകരാക്രമണത്തില്‍ പാകിസ്ഥാന്റെ പങ്ക് വ്യക്തമായതോടെ ഇന്ത്യ തക്ക മറുപടി നല്‍കാന്‍ ഒരുങ്ങിയിരിക്കുകയാണ്. പാകിസ്ഥാനുമായുള്ള നയതന്ത്ര സഹകരണം അവസാനിപ്പിച്ചേക്കുമെന്നാണ് കേന്ദ്രസര്‍ക്കാരില്‍ നിന്നുളള സൂചന. പാകിസ്ഥാന്റെ തലസ്ഥാനമായ ഇസ്ലാമാബാദിലെ ഇന്ത്യന്‍ ഹൈക്കമ്മീഷന്‍ കാര്യാലയത്തിന്റെ പ്രവര്‍ത്തനം നിര്‍ത്തുമെന്ന് റിപ്പോര്‍ട്ടുകളുണ്ട്. ഒപ്പം സിന്ധു നദീജല കരാര്‍ റദ്ദാക്കിയേക്കുമെന്നും വിവരങ്ങള്‍ പുറത്തുവന്നിരുന്നു.
https://www.facebook.com/Malayalivartha
