പഹല്ഗാം ഭീകരാക്രമണത്തില് തിരിച്ചടി തുടങ്ങി ഇന്ത്യ.... 215 പാകിസ്ഥാനി പൗരന്മാര് അട്ടാരി അതിര്ത്തി വഴി മടങ്ങി, 416 ഇന്ത്യന് പൗരന്മാര് പാകിസ്ഥാനില് നിന്ന് തിരിച്ചെത്തി, ഇന്ത്യയും പാകിസ്ഥാനും സംയമനം പാലിക്കണമെന്ന് ഐക്യരാഷ്ട്രസഭ...
ഇന്ത്യയും പാകിസ്ഥാനും സംയമനം പാലിക്കണമെന്ന് ഐക്യരാഷ്ട്രസഭ ആവശ്യപ്പെട്ടു. 215 പാകിസ്ഥാനി പൗരന്മാര് അട്ടാരി അതിര്ത്തി വഴി മടങ്ങി. 416 ഇന്ത്യന് പൗരന്മാര് പാകിസ്ഥാനില് നിന്ന് തിരിച്ചെത്തി. വീസ റദ്ദാക്കാനുള്ള തീരുമാനത്തിന്റെ അടിസ്ഥാനത്തിലാണ് മടക്കം.
പഹല്ഗാം ഭീകരാക്രമണത്തില് തിരിച്ചടി തുടങ്ങി ഇന്ത്യ. ബിജ്ബഹേരയിലും ത്രാലിലുമായി രണ്ട് ഭീകരരുടെ വീടുകള് കഴിഞ്ഞ രാത്രി തകര്ത്തു. ബന്ദിപ്പോരയിലെ കുല്നാര് ബാസിപ്പോരയില് ലഷ്ക്കര് ഇ തയ്ബ ടോപ്പ് കമാന്ഡര് അല്ത്താഫ് ലല്ലിയെ വധിച്ചു. നിയന്ത്രണ രേഖയില് ഇന്ത്യന് പോസ്റ്റുകള്ക്ക് നേരെ വെടിയുതിര്ത്ത പാക് ആര്മിക്ക് തക്ക മറുപടി നല്കി. നയതന്ത്ര തലത്തിലെ നടപടികള്ക്ക് പിന്നാലെ നീക്കങ്ങള് ഇന്ത്യ കൂടുതല് ശക്തമാക്കുന്നു. മുഖ്യമന്ത്രിമാരുമായി സംസാരിച്ച അമിത്ഷാ, എത്രയും വേഗം പാക് പൗരന്മാരെ കണ്ടെത്തി നാടു കടത്താന് നിര്ദ്ദേശിച്ചു. ഞായറാഴ്ചക്കുള്ളില് നാട് വിടാനാണ് നല്കിയിരിക്കുന്ന നിര്ദ്ദേശം.
മെഡിക്കല് വിസയുള്ള പാകിസ്ഥാന്കാര്ക്ക് രണ്ട് ദിവസം കൂടി തുടരാവുന്നതാണ്. സിന്ധു നദീജല കരാര് മരവിപ്പിച്ചതിലെ തുടര് നീക്കങ്ങളും വിലയിരുത്തി. പഞ്ചാബ് അതിര്ത്തിയില് പിടികൂടിയ ബിഎസ്എഫ് ജവാന്റെ തുടര് വിവരങ്ങള് ലഭ്യമാക്കാത്തതില് ഇന്ത്യ കടുത്ത അതൃപ്തി പ്രകടിപ്പിച്ചു. ഇരു രാജ്യങ്ങള്ക്കുമിടയില് ബന്ധം കൂടുതല് മോശമാകുമ്പോള് ചര്ച്ചകളിലൂടെ പ്രശ്നം പരിഹരിക്കണമെന്ന് ഐക്യരാഷ്ട്രസഭ ആവശ്യപ്പെട്ടു.
പഹല്ഗാമില് ആക്രമണം നടത്തിയ അഞ്ച് ഭീകരരില് രണ്ട് പേരുടെ കൂടി രേഖാചിത്രം അന്വേഷണ സംഘം തയ്യാറാക്കി. മൂന്ന് പേരുടെ ചിത്രം നേരത്തെ പുറത്തു വിട്ടിരുന്നു. ജമ്മുകശ്മീരിലെത്തിയ കരസേന മേധാവി ജനറല് ഉപേന്ദ്ര ദ്വിവേദി സാഹചര്യം വിലയിരുത്തി.
https://www.facebook.com/Malayalivartha
