വൈഭവ് സൂര്യവംശിയെ അഭിനന്ദിച്ച് പ്രധാനമന്ത്രി നരേന്ദ്ര മോദി. ചെറിയ പ്രായത്തില്‍ തന്നെ വൈഭവ് വലിയ റെക്കോഡ് നേടിയെന്നും താരത്തിന്റെ പ്രകടനത്തിന് പിന്നില്‍ കഠിനാധ്വാനമുണ്ടെന്നും മോദി ബിഹാറില്‍ നടക്കുന്ന ഖേലോ ഇന്ത്യ യൂത്ത് ഗെയിംസ് ഉദ്ഘാടനം ചെയ്ത് സംസാരിക്കുന്നതിനിടെയാണ് പ്രധാനമന്ത്രി വൈഭവിനെ അഭിനന്ദിച്ചത്.ഐപിഎല്ലിലെ തകര്‍പ്പന്‍ പ്രകടനത്തിന് പിന്നാലെയാണ് മോദിയുടെ അഭിനന്ദനം.

'ഐപിഎല്ലില്‍ ബിഹാറിന്റെ പുത്രനായ വൈഭവ് സൂര്യവംശിയുടെ ഗംഭീര പ്രകടനം ഞാന്‍ കണ്ടു. ഇത്ര ചെറിയ പ്രായത്തില്‍ വൈഭവ് വലിയ റെക്കോര്‍ഡ് കുറിച്ചിരിക്കുന്നു. വൈഭവിന്റെ പ്രകടനത്തിന് പിന്നില്‍ ഏറെ കഠിനാധ്വാനമുണ്ട്.'- പ്രധാനമന്ത്രി പറഞ്ഞു.
'കഴിവ് വളര്‍ത്തിയെടുക്കാന്‍ അവന്‍ വിവിധ തലങ്ങളില്‍ നിരവധി മത്സരങ്ങള്‍ കളിച്ചു. നിങ്ങള്‍ എത്രത്തോളം കളിക്കുന്നുവോ, അത്രത്തോളം നിങ്ങള്‍ തിളങ്ങും. കഴിയുന്നത്ര മത്സരങ്ങളിലും പോരാട്ടങ്ങളിലും പങ്കെടുക്കുന്നത് വളരെ പ്രധാനപ്പെട്ടതാണ്. എന്‍ഡിഎ സര്‍ക്കാര്‍ അതിന്റെ നയങ്ങളില്‍ എല്ലായ്‌പ്പോഴും ഇതിന് ഏറ്റവും ഉയര്‍ന്ന മുന്‍ഗണന നല്‍കിയിട്ടുണ്ട്. '

'പുതിയ ദേശീയ വിദ്യാഭ്യാസ നയത്തില്‍ നമ്മള്‍ കായികവിനോദങ്ങളെ മുഖ്യധാരാ വിദ്യാഭ്യാസത്തിന്റെ ഭാഗമാക്കിയിരിക്കുന്നു. രാജ്യത്ത് നല്ല കളിക്കാര്‍ക്കൊപ്പം മികച്ച കായിക പ്രൊഫഷണലുകളെയും സൃഷ്ടിക്കുക എന്നതാണ് ഈ നയത്തിന്റെ ലക്ഷ്യമെന്നും' അദ്ദേഹം കൂട്ടിച്ചേര്‍ത്തു.

ഇന്ത്യന്‍ പ്രീമിയര്‍ ലീഗ് ക്രിക്കറ്റില്‍ ഗുജറാത്ത് ടൈറ്റന്‍സിനെതിരേ 35 പന്തില്‍ നൂറുറണ്‍സ് തികച്ചാണ് രാജസ്ഥാന്‍ താരം റെക്കോഡുകള്‍ തിരുത്തിയെഴുതിയത്. 38 പന്തില്‍ 101 റണ്‍സെടുത്താണ് വൈഭവ് പുറത്തായത്. ടി20 യില്‍ സെഞ്ചുറി നേടുന്ന ഏറ്റവും പ്രായം കുറഞ്ഞ താരം, ഐപിഎല്ലിലെ വേഗമേറിയ രണ്ടാമത്തെ സെഞ്ചുറി, ഒരു ഇന്ത്യക്കാരന്റെ അതിവേഗ ഐപിഎല്‍ സെഞ്ചുറി എന്നിങ്ങനെ പുതുചരിത്രം കുറിച്ചാണ് വൈഭവ് സവായ് മാന്‍സിങ് സ്റ്റേഡിയത്തില്‍ നിന്ന് തിരിച്ചു പോയത്.