രാഷ്ട്രപതി ദ്രൗപദി മുര്‍മു ഈ മാസം 18-ന് കേരളത്തിലെത്തും. ശബരിമലയില്‍ ദര്‍ശനം നടത്തുന്നതിനാണ് രാഷ്ട്രപതി എത്തുന്നത്. 19-നാണ് ശബരിമലയില്‍ ദര്‍ശനം നടത്താന്‍ തീരുമാനിച്ചിട്ടുള്ളത്.

തിരുവിതാംകൂര്‍ ദേവസ്വം വകുപ്പിന് രാഷ്ട്രപതി ഭവനില്‍ നിന്ന് ഇത് സംബന്ധിച്ച് അറിയിപ്പ് ലഭിച്ചിട്ടുണ്ട്. ശബരിമലയില്‍ എത്തുന്ന ആദ്യ രാഷ്ട്രപതിയാണ് ദ്രൗപദി മുര്‍മു. 18-ന് കേരളത്തില്‍ എത്തുന്ന രാഷ്ട്രപതി കോട്ടയം കുമരകത്തായിരിക്കും തങ്ങുക.

പാല സെന്റ് തോമസ് കോളേജിലെ ജൂബിലി സമ്മേളനത്തില്‍ പങ്കെടുക്കും. ഇടവമാസ പൂജയ്ക്കായി ശബരിമല നട തുറക്കുമ്പോള്‍ രാഷ്ട്രപതി എത്തുമെന്ന വിവരം നേരത്തെ പുറത്തുവന്നിട്ടുണ്ടായിരുന്നു. എന്നാല്‍ ഔദ്യോഗിക അറിയിപ്പ് ഉണ്ടായിരുന്നില്ല.
രാഷ്ട്രപതിയുടെ സന്ദര്‍ശനത്തോടനുബന്ധിച്ച് സുരക്ഷ കര്‍ശനമാക്കാന്‍ സംസ്ഥാന സര്‍ക്കാരിന് നിര്‍ദേശം ലഭിച്ചിട്ടുണ്ടെന്നാണ് സൂചനകളുള്ളത്. സന്ദര്‍ശന ദിവസം വെര്‍ച്വല്‍ ബുക്കിംഗില്‍ ഉള്‍പ്പെടെ ദേവസ്വം നിയന്ത്രണം ഏര്‍പ്പെടുത്തി.