നടന്‍ അജാസ് ഖാനെതിരെ പുതിയ പരാതിയുമായി യുവതി
അശ്ലീല ഉള്ളടക്കം റിയാലിറ്റി ഷോയിലൂടെ അവതരിപ്പിച്ചതിന് കേസെടുത്തതിന് പിന്നാലെ നടന്‍ അജാസ് ഖാനെതിരെ ബലാത്സംഗ പരാതിയുമായി യുവതി. ഹൗസ് അറസ്റ്റ് എന്ന റിയാലിറ്റി ഷോയില്‍ വേഷം നല്‍കാമെന്ന് പറഞ്ഞും വിവാഹ വാഗ്ദാനം നല്‍കിയും ബലാത്സംഗം ചെയ്‌തെന്ന് ഒരു യുവതിയാണ് അജാസ് ഖാനെതിരെ പരാതി നല്‍കിയത്. യുവതിയുടെ പരാതിയുടെ അടിസ്ഥാനത്തില്‍ ചാര്‍കോപ്പ് പൊലീസ് അജാസ്ഖാനെതിരെ ബലാത്സംഗ കേസെടുത്തു. പരാതിയില്‍ കൂടുതല്‍ അന്വേഷണം നടന്നുവരികയാണ്. റിയാലിറ്റി ഷോയില്‍ അവതാരകയുടെ വേഷം വാഗ്ദാനം ചെയ്താണ് അജാസ് ഖാന്‍ വിളിച്ചതെന്ന് യുവതി പരാതിയില്‍ പറയുന്നു. ഷൂട്ടിംഗിനിടെ അജാസ് ആദ്യം യുവതിയോട് വിവാഹാഭ്യര്‍ത്ഥന നടത്തി. പിന്നീട് ഇവരുടെ വീട്ടിലെത്തി ബലാത്സംഗം ചെയ്തുവെന്നുമാണ് ആരോപണം.
ഹൗസ് അറസ്റ്റ് എന്ന പരിപാടിക്കിടയില്‍ മത്സരാര്‍ത്ഥികളോട് കാമസൂത്രയിലെ വിവിധ സെക്‌സ് പൊസിഷനുകള്‍ അനുകരിക്കാന്‍ അജാസ് ഖാന്‍ ആവശ്യപ്പെട്ടത് കഴിഞ്ഞ ദിവസം വ്യാപക പ്രതിഷേധത്തിന് ഇടയാക്കിയിരുന്നു. .ഇതോടെ അജാസ് ഖാനും പരിപാടിക്കുമെതിരെ ബജ്‌റംഗ് ദള്‍ പ്രവര്‍ത്തകന്‍ മുംബയ് പൊലീസിന് പരാതി നല്‍കുകയായിരുന്നു. തുടര്‍ന്ന് പൊലീസ് അജാസ് ഖാനും റിയാലിറ്റി ഷോയുടെ നിര്‍മാതാവ് രാജ് കുമാര്‍ പാണ്ഡെയ്ക്കുമെതിരെ കേസെടുത്തിട്ടുണ്ട്.സ്ത്രീകളെ മോശമായി ചിത്രീകരിച്ചു, പൊതുസ്ഥലത്ത് സഭ്യമല്ലാത്ത രീതിയില്‍ പെരുമാറി തുടങ്ങിയ വകുപ്പുകളാണ് ഇവര്‍ക്കെതിരെ ചുമത്തിയിട്ടുള്ളത്. വിവാദത്തെ തുടര്‍ന്ന് അജാസ് ഖാന്‍, ഷോ പ്രക്ഷേപണം ചെയ്ത 'ഉല്ലു' സ്ട്രീമിംഗ് പ്ലാറ്റ്‌ഫോമിന്റെ സിഇഒ വിദ്യ അഗര്‍വാള്‍ എന്നിവര്‍ക്ക് ദേശീയ വനിതാ കമ്മിഷന് സമന്‍സ് അയച്ചിട്ടുണ്ട്. മേയ് ഒമ്പതിനകം കമ്മിഷന് മുന്‍പില്‍ ഹാജരാകാനാണ് നിര്‍ദ്ദേശം.
വനിത മത്സരാര്‍ത്ഥികളോട് സെക്‌സ് പൊസിഷനുകള്‍ അഭിനയിക്കാന്‍ അജാസ് ഖാന്‍ പ്രേരിപ്പിക്കുന്ന വീഡിയോ ശകലങ്ങള്‍ പുറത്തുവന്നതോടെയാണ് സോഷ്യല്‍ മീഡിയയില്‍ വ്യാപക പ്രതിഷേധമുയര്‍ന്നത്. വിഡിയോ വിവാദമായതോടെ അഡല്‍ട്ട് സ്ട്രീമിംഗ് പ്ലാറ്റ്‌ഫോമായ ഉല്ലുവില്‍ നിന്ന് റിയാലിറ്റി ഷോയുടെ എപ്പിസോഡുകള്‍ നീക്കിയിട്ടുണ്ട്. കഴിഞ്ഞ മാസം 11 മുതലാണ് ഇത് സംപ്രേഷണം ചെയ്ത് തുടങ്ങിയത്.
https://www.facebook.com/Malayalivartha
