വിവാഹ ചടങ്ങിനിടെ നവവധു കുഴഞ്ഞുവീണ് മരിച്ചു
വിവാഹത്തിന് ഒരു ദിവസം മുമ്പ് നവവധു കുഴഞ്ഞുവീണ് മരിച്ചു. ഇസ്ലാംനഗര്‍ പോലീസ് സ്റ്റേഷന്‍ പരിധിയിലെ നൂര്‍പൂര്‍ പിനൗനി ഗ്രാമത്തിലാണ് സംഭവം. ഞായറാഴ്ച രാത്രി 'ഹാല്‍ദി' ചടങ്ങിനിടെ സഹോദരിമാര്‍ക്കും ബന്ധുക്കള്‍ക്കും ഒപ്പം നൃത്തം ചെയ്യുകയായിരുന്നു 22 കാരിയും നവവധുവുമായ ദീക്ഷ. എന്നാല്‍ പെട്ടെന്ന് യുവതിയ്ക്ക് അസ്വസ്ഥത അനുഭവപ്പെട്ടതായി കുടുംബം പറഞ്ഞു. ഇതോടെ യുവതി ശുചിമുറിയിലേക്ക് പോയി. അവിടെ വെച്ച് ഹൃദയാഘാതത്തെ തുടര്‍ന്ന് യുവതി കുഴഞ്ഞുവീണെന്നാണ് കുടുംബം പറയുന്നത്.
ഏറെ നേരം കഴിഞ്ഞിട്ടും പുറത്തു വരാത്തതിനാല്‍ കുടുംബാംഗങ്ങള്‍ വാതിലില്‍ മുട്ടിയെങ്കിലും പ്രതികരണമൊന്നും ലഭിച്ചില്ലെന്ന് പിതാവ് ദിനേശ് പാല്‍ സിംഗ് പറഞ്ഞു. വാതില്‍ പൊളിച്ച് തുറന്നപ്പോഴാണ് അവള്‍ അബോധാവസ്ഥയില്‍ കിടക്കുന്നത് കണ്ടത്. സംഭവസ്ഥലത്ത് വെച്ച് തന്നെ യുവതി മരിച്ചിരുന്നു.
മൊറാദാബാദ് ജില്ലയിലെ ശിവപുരി സ്വദേശിയും പ്രാദേശിക ഫാക്ടറിയില്‍ ജോലിക്കാരനുമായ സൗരഭുമായി തിങ്കളാഴ്ച ദീക്ഷയുടെ വിവാഹം നടത്താന്‍ തീരുമാനിച്ചിരുന്നതായി പോലീസ് പറഞ്ഞു. മൊറാദാബാദില്‍ നിന്ന് വരന്റെ ഘോഷയാത്ര അതേ ദിവസം തന്നെ എത്തേണ്ടതായിരുന്നു. വിവാഹത്തിനുള്ള ഒരുക്കങ്ങള്‍ ദിവസങ്ങളായി നടന്നുവരികയായിരുന്നു, നിരവധി ബന്ധുക്കള്‍ വീട്ടില്‍ തടിച്ചുകൂടിയിരുന്നു. കുടുംബം പരാതി നല്‍കാന്‍ വിസമ്മതിക്കുകയും പോസ്റ്റ്മോര്‍ട്ടം നടത്താന്‍ വിസമ്മതിക്കുകയും ചെയ്തുവെന്ന് ഇസ്ലാംനഗര്‍ സ്റ്റേഷന്‍ ഹൗസ് ഓഫീസര്‍ വിശാല്‍ പ്രതാപ് സിംഗ് പറഞ്ഞു.
https://www.facebook.com/Malayalivartha
