ഇന്ത്യ-പാക് വെടിനിര്‍ത്തലിന്‌ ശേഷം പ്രധാനമന്ത്രി നരേന്ദ്ര മോദി രാജ്യത്തെ അഭിസംബോധന ചെയ്തതിന് തൊട്ടുപിന്നാലെ പാക്കിസ്ഥാന്റെ ഡ്രോണ്‍ ആക്രമണ ശ്രമം വീണ്ടും നടന്നതായി റിപ്പോര്‍ട്ട്. സാംബയില്‍ 10 മുതല്‍ 12 ഡ്രോണുകള്‍ വരെ ഇന്ത്യയെ ലക്ഷ്യം വച്ചെത്തി എന്നാണ് റിപ്പോര്‍ട്ടുകള്‍. ഇതിന്റെ ദൃശ്യങ്ങളും പുറത്തു വന്നിട്ടുണ്ട്. ഇന്ത്യയുടെ വ്യോമ പ്രതിരോധ സംവിധാനം, ഡ്രോണ്‍ ആക്രമണ ശ്രമം ചെറുത്തു.

പഞ്ചാബിലെ ചിലയിടങ്ങളില്‍ ഡ്രോണ്‍ സാന്നിധ്യം ഉണ്ടായിരുന്നെന്നും അമൃത്സറില്‍ സൈറണ്‍ മുഴങ്ങിയെന്നും റിപ്പോര്‍ട്ടുകളുണ്ട്. എന്നാല്‍ ഇതുവരെ ആക്രമണമൊന്നും നടന്നിട്ടില്ല. ഇതുവരെ പ്രശ്‌നങ്ങളൊന്നും ഉണ്ടായിട്ടില്ലെന്നും സ്ഥിതിഗതികള്‍ കര്‍ശനമായി നിരീക്ഷിക്കുന്നുണ്ടെന്നും അധികൃതര്‍ അറിയിച്ചു. കഴിഞ്ഞ 15 മിനിറ്റായി സാംബയിലെ സ്ഥിതിഗതികള്‍ ശാന്തമാണെന്ന് ദേശീയ മാധ്യമങ്ങള്‍ റിപ്പോര്‍ട്ട് ചെയ്യുന്നു. സാംബയിലും അമൃത്സറിലും മുന്‍കരുതലായി വിളക്കുകള്‍ അണച്ചു. അമൃത്സറിലേക്കുള്ള വിമാനങ്ങള്‍ ഡല്‍ഹിക്ക് തിരിച്ചുവിട്ടു.