നേപ്പാളിലെ പ്രക്ഷോഭത്തില്‍ കത്തിയമര്‍ന്ന് 800 കോടി രൂപ ചെലവഴിച്ച് നിര്‍മിച്ച രാജ്യത്തെ ഏറ്റവും ഉയരം കൂടിയ ഹോട്ടലായ ഹില്‍ട്ടണ്‍ കഠ്മണ്ഡു. ഏഴ് വര്‍ഷത്തെ പ്രയത്‌നത്തിനുശേഷം 800 കോടി രൂപ ചെലവഴിച്ച് നിര്‍മിച്ച ഹോട്ടല്‍ 2024 ജൂലായിലാണ് പ്രവര്‍ത്തനം ആരംഭിച്ചത്. 64 മീറ്റര്‍ ആണ് ഹോട്ടലിന്റെ ഉയരം.

വിവിധ വിഭാഗങ്ങളിലായി ഏകദേശം 176 മുറികളും ഇവിടെയുണ്ടായിരുന്നു. അഞ്ച് റെസ്‌റ്റോറന്റുകള്‍, സ്പാ, ജിം, പരിപാടികള്‍ നടത്താനുള്ള സൗകര്യങ്ങള്‍ എന്നിവയെല്ലാം ഹോട്ടലിന്റെ സവിശേഷതകളായിരുന്നു. ഹോട്ടല്‍ കത്തുന്ന ദൃശ്യം സമൂഹമാധ്യമങ്ങളില്‍ വലിയതോതില്‍ പ്രചരിക്കുകയാണ്.

തീപിടിത്തത്തില്‍ ഹോട്ടലിലെ ജനലുകള്‍ പൂര്‍ണമായും തകര്‍ന്നതായാണ് വിവരം. മുന്‍ഭാഗവും ഉള്‍വശവും പൂര്‍ണമായും കത്തിനശിച്ചു. കഠ്മണ്ഡു നഗരത്തിന്റെയും മഞ്ഞുമലകളുടെയും 180 ഡിഗ്രിയിലുള്ള വിശാലമായ കാഴ്ചകള്‍ കാണാമായിരുന്ന ഹോട്ടലാണ് കത്തി നശിച്ചത്. നേപ്പാളിന്റെ ഭൂകമ്പ സാധ്യതകള്‍ കണക്കിലെടുത്ത് ശക്തമായ പ്രതിരോധശേഷിയോടെയാണ് ഹില്‍ട്ടണ്‍ രൂപകല്‍പ്പന ചെയ്തിരുന്നത്. ഭൂകമ്പങ്ങളെ ചെറുക്കാന്‍ ഷിയര്‍ ഭിത്തികളും ഡാംപിങ് സംവിധാനങ്ങളും കെട്ടിടത്തില്‍ ഉള്‍പ്പെടുത്തിയിരുന്നു.