പാര്‍ട്ടി പരിപാടിക്ക് വൈകിയെത്തിയ കോണ്‍ഗ്രസ് നേതാവ് രാഹുല്‍ ഗാന്ധിയെ ശിക്ഷിച്ച് പാര്‍ട്ടി ഘടകം. 10 പുഷ് അപ്പാണ് ലോക്‌സഭാ പ്രതിപക്ഷ നേതാവിന് ലഭിച്ചത്. അദ്ദേഹത്തിനൊപ്പം വൈകിയെത്തിയ ജില്ലാ അധ്യക്ഷന്മാരും പുഷ്അപ്പ് ചലഞ്ചിന്റെ ഭാഗമായി. മധ്യപ്രദേശിലെ സംഘടനാ സംവിധാനത്തെ പുനരുജ്ജീവിപ്പിക്കുന്നതിന്റെ ഭാഗമായി നടത്തിയ പരിശീലന പരിപാടിയായ സംഘടന്‍ സൃഷ്ടി അഭിയാന്‍ എന്ന പരിപാടിക്കിടെയാണ് സംഭവം.

ബിഹാറിലെ തിരഞ്ഞെടുപ്പ് പ്രചാരണത്തിനിടയില്‍ നിന്നാണ് രാഹുല്‍ ഗാന്ധി പാര്‍ട്ടി പരിപാടിക്കെത്തിയത്. സെഷനിലെത്തുന്നതിനിടെ രാഹുല്‍ ഗാന്ധി വൈകി. വൈകി വരുന്നവര്‍ക്ക് ശിക്ഷാ നടപടിയുണ്ടെന്ന് പരിശീലനത്തിന്റെ ചുമതലക്കാരനായ സച്ചിന്‍ റാവു രാഹുല്‍ ഗാന്ധിയോട് പറഞ്ഞു. ഇതോടെ എന്താണ് ചെയ്യേണ്ടെന്ന് ചോദിച്ച രാഹുല്‍, സച്ചിന്‍ റാവുവിന്റെ നിര്‍ദ്ദേശ പ്രകാരം 10 പുഷ്അപ്പ് എടുക്കുകയായിരുന്നു. രാഹുല്‍ ഗാന്ധിയുടെ സ്ഥിരം വേഷമായ വെള്ള ടീഷര്‍ട്ടും പാന്റ്‌സുമായിരുന്നു ധരിച്ചിരുന്നത്. രാഹുലിനൊപ്പം വൈകിയെത്തിയ ജില്ലാ അധ്യക്ഷന്മാരും പുഷ്അപ്പ് എടുത്തു.

പരിശീലന ചടങ്ങില്‍ ബിജെപിയെയും തിരഞ്ഞെടുപ്പ് കമ്മീഷനെയും ലക്ഷ്യം വച്ച് വോട്ട് ചോര്‍ന്ന ആരോപണങ്ങള്‍ രാഹുല്‍ ഗാന്ധി ആവര്‍ത്തിച്ചു. മധ്യപ്രദേശ് തിരഞ്ഞെടുപ്പിലും സമാനമായ ക്രമക്കേടുകള്‍ നടന്നു എന്നും രാഹുല്‍ ഗാന്ധി അവകാശപ്പെട്ടു. 'കുറച്ചു ദിവസം മുന്‍പ് ഹരിയാനയിലെ വോട്ടു കൊള്ള അവതരിപ്പിച്ചിരുന്നു. അവിടെ 25 ലക്ഷം വോട്ടുകള്‍ മോഷ്ടിക്കപ്പെട്ടു. ഓരോ എട്ട് വോട്ടിലും ഒരെണ്ണം എന്ന നിലയില്‍. ഇതാണ് അവരുടെ രീതി. വോട്ട് മോഷണമാണ് പ്രധാന പ്രശ്‌നം. ഞങ്ങളുടെ പക്കല്‍ തെളിവുണ്ട്. അത് ഓരോന്നായി പുറത്തുവിടും' എന്നാണ് രാഹുല്‍ വേദിയില്‍ സംസാരിച്ചത്.