ചെങ്കോട്ടക്ക് സമീപം കാറിലുണ്ടായ സ്ഫോടനത്തിൽ  9 മരണം, 18 പേർക്ക് പരിക്കേറ്റു, ഇവരിൽ ആറുപേരുടെ നില ഗുരുതരമായി തുടരുന്നു. അപകടത്തിൽ പരിക്കേറ്റവരെ എൽ.എൻ.ജെ.പി ആശുപത്രിയിലേക്ക് മാറ്റിയിരിക്കുകയാണ്. ചെങ്കോട്ട മെട്രോ സ്റ്റേഷൻ ഗേറ്റ് നമ്പർ ഒന്നിന് സമീപമാണ് തിങ്കളാഴ്ച വൈകുന്നേരം സ്ഫോടനം റിപ്പോർട്ട് ചെയ്തത്. സംഭവസ്ഥലത്ത് രക്തവും ശരീരാവശിഷ്ടങ്ങളും ചിതറി കിടക്കുന്നതു കാണാനാകും. സ്ഫോടനത്തിന്റെ ആഘാതത്തിൽ സമീപത്തെ വഴിവിളക്കുകൾ ചിന്നിച്ചിതറി. ഭൂകമ്പത്തിന് സമാനമായ പ്രതീതിയായിരുന്നുവെന്ന് ദൃക്സാക്ഷികൾ .

അപ്രതീക്ഷിത സ്ഫോടനം പ്രദേശത്ത് വലിയ പരിഭ്രാന്തിയാണ് പരത്തിയത്. . മെട്രോ സ്റ്റേഷന് സമീപം നിർത്തിയ ഐ20 കാർ പൊട്ടിത്തെറിക്കുകയായിരുന്നു. തുടർന്ന് തൊട്ടടുത്തുള്ള വാഹനങ്ങളിലേക്കും തീപടർന്നു പിടിക്കുകയായിരുന്നു . കിലോമീറ്ററുകൾക്കപ്പുറം സ്​ഫോടനത്തിന്റെ പ്രകമ്പനമെത്തി. അഗ്നിരക്ഷാസേനയുടെ നേതൃത്വത്തിൽ ഏറെ ശ്രമിച്ചാണ് തീ നിയന്ത്രണ വിധേയമാക്കിയത്.

അതേസമയം, വേഗത കുറച്ചുവന്ന കാർ ചെങ്കോട്ടക്ക് സമീപമുള്ള സിഗ്നലിൽ നിർത്തിയതിന് പിന്നാലെയാണ് സ്​ഫോടനമുണ്ടായതെന്ന് ഡൽഹി പൊലീസ് കമീഷണർ . സ്ഫോടനമുണ്ടായ കാറിൽ ഡ്രൈവറെ കൂടാതെ വേറെയും ആളുണ്ടായിരുന്നുവെന്നും സതീഷ് പറഞ്ഞു. എൻ.ഐ.എ അടക്കം കേന്ദ്ര ഏജൻസികളും സംഭവസ്ഥലത്തെത്തി.