ജിം ഉടമയ്ക്കും കുടുംബത്തിനും നേരെ ഗുണ്ടാ ആക്രമണം നടത്തിയ കെയര് ടേക്കര് അറസ്റ്റില്
ജോലിചെയ്യുന്ന സ്ഥാപനം തട്ടിയെടുക്കാന് ഉടമയുടെ വീട്ടില് അതിക്രമിച്ച് കയറി കുടുംബത്തിന് നേരെ ആക്രമണം നടത്തിയ ജീവനക്കാരന് അറസ്റ്റില്. ജിം ഉടമയായ രാജേഷ് ഗാര്ഗ്, ഭാര്യ, മകന് എന്നിവരെയാണ് ഗുണ്ടകള് ആക്രമിച്ചത്. ജനുവരി രണ്ടിന് രാജ്യതലസ്ഥാനത്തെ ലക്ഷ്മി നഗറിലായിരുന്നു സംഭവം. സംഭവത്തിന്റെ നടുക്കുന്ന സിസിടിവി ദൃശ്യങ്ങള് പൊലീസ് പുറത്തുവിട്ടിട്ടുണ്ട്.
പൊലീസ് പറയുന്നത് ഇങ്ങനെ; വീടിന്റെ ബേസ്മെന്റില് ഭാര്യയോടൊപ്പം ജിം നടത്തി വരികയായിരുന്നു രാജേഷ് ഗാര്ഗ്. ജിമ്മിലെ കെയര് ടേക്കറായ സതീഷ് യാദവ് സ്ഥാപനം തട്ടിയെടുക്കാന് ശ്രമിച്ചതുമായി ബന്ധപ്പെട്ട തര്ക്കമാണ് അക്രമത്തില് കലാശിച്ചത്. ജനുവരി രണ്ടിന് ബേസ്മെന്റിലെ പൈപ്പ് ചോര്ച്ച പരിശോധിക്കാന് പോയ രാജേഷിനെയും ഭാര്യയെയും സതീഷും സംഘവും ചേര്ന്ന് ആക്രമിക്കുകയായിരുന്നു. മാതാപിതാക്കളെ രക്ഷിക്കാന് എത്തിയ മകനെ ഗുണ്ടാസംഘം പിടികൂടി നടുറോഡിലേക്ക് വലിച്ചിഴയ്ക്കുകയും, വസ്ത്രങ്ങള് അഴിച്ചു മാറ്റിയ ശേഷം ക്രൂരമായി മര്ദ്ദിക്കുകയും ചെയ്തു.
രാജേഷിന്റെ ഭാര്യയുടെ മുടിയില് പിടിച്ചു വലിച്ച് മുഖത്ത് ക്രൂരമായി ഇടിക്കുകയും ചവിട്ടുകയും ചെയ്തു. ഇരുമ്പ് വടികള് ഉപയോഗിച്ചായിരുന്നു മൂവരെയും സതീശിന്റെ ഗുണ്ടാ സംഘം ആക്രമിച്ചത്. മര്ദനത്തില് ഇവരുടെ മകന്റെ തലയ്ക്ക് ഗുരുതരമായി പരിക്കേല്ക്കുകയും പല്ല് കൊഴിയുകയും ചെയ്തു. രാജേഷിന്റെ മുഖത്തും നീരും മുറിവുകളുമുണ്ട്. രാജേഷിന്റെ വായപോലും തുറക്കാന് കഴിയാത്ത സ്ഥിതിയിലാണെന്ന് പൊലീസ് പറയുന്നു .
സംഭവത്തില് പ്രധാന പ്രതിയായ സതീശ് യാദവിനെ പൊലീസ് അറസ്റ്റ് ചെയ്തിട്ടുണ്ട്. കൂട്ടുപ്രതികളായ വികാസ് യാദവ്, ശുഭം യാദവ്, ഓംകാര് യാദവ് എന്നിവര്ക്കായി പൊലീസ് തിരച്ചില് ഊര്ജിതമാക്കിയിരിക്കുകയാണ്. വധശ്രമം, സ്ത്രീത്വത്തെ അപമാനിക്കല്, മര്ദനം തുടങ്ങിയ വകുപ്പുകള് ചുമത്തി പ്രതികള്ക്കെതിരെ കേസെടുത്തു.
https://www.facebook.com/Malayalivartha
