ജനസംഖ്യ നിയന്ത്രിക്കുന്നതിന് രാജ്യത്ത് വന്ധ്യംകരണം നടപ്പിലാക്കണമെന്ന് കേന്ദ്രമന്ത്രി ഗിരിരാജ് സിംഗ്. നോട്ട് നിരോധനത്തിന് ശേഷം രാജ്യത്ത് അടിയന്തരമായി നടപ്പിലാക്കേണ്ട കാര്യം വന്ധ്യംകരണമാണെന്ന് ഗിരിരാജ് സിംഗ് പറഞ്ഞു. ചെറുകിട വാണിജ്യ വകുപ്പ് മന്ത്രിയാണ് ഗിരിരാജ് സിംഗ്. ലോകജനസംഖ്യയുടെ പതിനാറ് ശതമാനം ഇന്ത്യയിലാണ്.

ഓസ്‌ട്രേലിയയുടെ ജനസംഖ്യ വര്‍ധിക്കുന്ന നിരക്കിലാണ് ഇന്ത്യയുടെ ജനസംഖ്യ വര്‍ധിക്കുന്നത്. ജനസംഖ്യാ വിസ്‌ഫോടനമാണ് ഇന്ത്യ നേരിടുന്നത്. ഇ;് അടിയന്തരമായി നിയന്ത്രിക്കേണ്ടതുണ്ടെന്ന് ഗിരിരാജ് പറഞ്ഞു. ഹിന്ദുക്കള്‍ ജനസംഖ്യ വര്‍ധിപ്പിക്കണമെന്ന് ഒക്ടോബറില്‍ സിംഗ് ആവശ്യപ്പെട്ടിരുന്നു.

എട്ടോളം സംസ്ഥാനങ്ങളില്‍ ഹിന്ദുക്കളുടെ ജനസംഖ്യ കുറഞ്ഞ് കൊണ്ടിരിക്കുകയാണ് അതിനാല്‍ ജനസംഖ്യ വര്‍ധിപ്പിക്കണമെന്നുമായിരുന്നു ഗിരിരാജ് സിംഗിന്റെ പ്രസ്താവന.
നോട്ട് നിരോധനത്തിന് ശേഷം വന്ധ്യംകരണം ആവശ്യപ്പെടുന്ന രണ്ടാമത്തെ ബി.ജെ.പി നേതാവാണ് ഗിരിരാജ് സിംഗ്. കേന്ദ്രമന്ത്രിയും ബി.ജെ.പി നേതാവുമായ സഞ്ജയ് പാസ്വാനും കഴിഞ്ഞ ആഴ്ച വന്ധ്യംകരണം നടത്തണമെന്ന് ആവശ്യപ്പെട്ടിരുന്നു.