അന്തരിച്ച തമിഴ്‌നാട് മുഖ്യമന്ത്രി ജയലളിതയുടെ ഭൗതികശരീരം ചെന്നൈ രാജാജി ഹാളില്‍ പൊതുദര്‍ശനത്തിന് വെച്ചു. വൈകുന്നേരം നാലുവരെ പൊതുജനങ്ങള്‍ക്ക് ആദരാഞ്ജലി അര്‍പ്പിക്കാം. ശേഷം സംസ്‌കാര ചടങ്ങുകള്‍ മെറീന ബീച്ചില്‍ നടക്കും. എം.ജി.ആര്‍ സ്മാരകത്തോട് ചേര്‍ന്ന് തന്നെയാകും ജയലളിതക്കും ചിതയൊരുക്കുക.

പ്രധാനമന്ത്രി നരേന്ദ്ര മോഡി ആദരാഞ്ജലി അര്‍പ്പിക്കാന്‍ ചെന്നൈയിലെത്തും. കോണ്‍ഗ്രസ് ഉപാധ്യക്ഷന്‍ രാഹുല്‍ ഗാന്ധി അടക്കം രാജ്യത്തെ വിവിധ തുറകളിലുള്ള പ്രമുഖര്‍ സംസ്‌കാര ചടങ്ങില്‍ പങ്കെടുക്കും. കേന്ദ്രസര്‍ക്കാറിനു വേണ്ടി കേന്ദ്രമന്ത്രിമാരായ വെങ്കയ്യ നായിഡു, പൊന്‍ രാധാകൃഷ്ണന്‍ എന്നിവര്‍ പങ്കെടുക്കും.

ജയക്ക് ആദരാഞ്ജലി അര്‍പ്പിക്കാന്‍ തമിഴ്‌നാടിന്റെ വിവിധ ഭാഗങ്ങളില്‍ നിന്നുള്ള പ്രവര്‍ത്തകരും വാഹനങ്ങളിലായി ചെന്നൈയിലേക്ക് തിരിച്ചിട്ടുണ്ട്.