അന്തരിച്ച തമിഴ്‌നാട് മുഖ്യമന്ത്രി ജയലളിതയ്ക്കു തമിഴകം വിട നല്‍കുന്നു. മൃതദേഹം പൊതുദര്‍ശനത്തിനു വച്ചിരുന്ന രാജാജി ഭവനില്‍നിന്ന് സംസ്‌കാര ചടങ്ങുകള്‍ നടക്കുന്ന മറീന ബീച്ചിലേക്കുള്ള വിലാപയാത്ര തുടങ്ങി. എംജിആറിന്റെ സംസ്‌കാരം നടത്തിയ മറീനയില്‍ അദ്ദേഹത്തിന്റെ സ്മാരകത്തിനടുത്തായിരിക്കും ജയയ്ക്കും അന്ത്യവിശ്രമസ്ഥലമൊരുങ്ങുക.

രാഷ്ട്രപതി പ്രണബ് മുഖര്‍ജി, പ്രധാനമന്ത്രി നരേന്ദ്ര മോദി, കോണ്‍ഗ്രസ് ഉപാധ്യക്ഷന്‍ രാഹുല്‍ ഗാന്ധി, കേരള മുഖ്യമന്ത്രി പിണറായി വിജയന്‍, പ്രതിപക്ഷ നേതാവ് രമേശ് ചെന്നിത്തല, മുന്‍ മുഖ്യമന്ത്രി ഉമ്മന്‍ ചാണ്ടി, ഗവര്‍ണര്‍ പി.സദാശിവം, നടന്‍ രജനീകാന്ത് തുടങ്ങിയവര്‍ ജയയ്ക്ക് ആദരാഞ്ജലിയര്‍പ്പിക്കാന്‍ എത്തിയിരുന്നു.