തമിഴ്‌നാട് മുഖ്യമന്ത്രിയായിരുന്ന ജയലളിതയുടെ രഹസ്യമകള്‍ എന്ന അടിക്കുറപ്പോടെ സമൂഹമാധ്യമങ്ങളില്‍ ഒരു യുവതിയുടെ ചിത്രം പ്രചരിക്കാന്‍ തുടങ്ങിട്ട് ദിവസങ്ങള്‍ ഏറെയായി. ജയലളിതയുടെ മുഖച്ഛായയുമായി ഏതാണ്ട് സാമ്യമുള്ള യുവതിയുടെ ചിത്രം നിരവധിപേര്‍ ഷെയര്‍ ചെയ്യുകയും ചെയ്തു. ജയയുടെ രഹസ്യ മകളാണെന്നായിരുന്നു ചിത്രത്തിനൊപ്പമുള്ള പ്രചരണം. പേരറിയാത്ത ഇവരുടെ താമസം അമേരിക്കയിലാണെന്നും അഭ്യൂഹമുണ്ടായിരുന്നു. എന്നാല്‍ ചിത്രത്തിന്റെ യാഥാര്‍ത്ഥ്യം വ്യക്തമാക്കിക്കൊണ്ട് പ്രശസ്ത ഗായികയും ടിവി അവതാരകയുമായ ചിന്‍മയി ശ്രിപദ രംഗത്തെത്തി.

ഈ യുവതിയുടെ പേര് ദിവ്യ രാമനാഥന്‍ വിരരാഘവന്‍ എന്നാണ്. അവര്‍ ജയലളിതയുടെ മകളല്ല. ഭര്‍ത്താവിനൊപ്പം ഓസ്‌ട്രേലിയയില്‍ താമസിക്കുന്നു. ഭര്‍ത്താവിനൊപ്പമുള്ള യുവതിയുടെ ചിത്രവും ചിന്‍മയി പുറത്തുവിട്ടിട്ടുണ്ട്.

ചിത്രത്തില്‍ കാണുന്ന ദമ്പതികള്‍ പ്രശസ്തരായ ശാസ്ത്രീയ സംഗീതജ്ഞരുടെ കുടുംബാംഗങ്ങളാണ്. എന്റെ കുടുംബത്തിന് ഇവരെ വളരെ അടുത്തറിയാം. യുവതിയെക്കുറിച്ച് അഭ്യൂഹങ്ങള്‍ പരക്കാന്‍ തുടങ്ങിയിട്ട് നാളേറെയായി.

ഗൂഗിള്‍ ഇമേജ് സെര്‍ച്ചില്‍ പോലും ഇവര്‍ ജയലളിതയുടെ മകളാണെന്ന തരത്തില്‍ ചിത്രീകരിക്കപ്പെട്ടു. ഒരു നുണ ദീര്‍ഘനാള്‍ ആവര്‍ത്തിച്ചാല്‍ അത് സത്യമാകുമെന്ന പഴമൊഴിയെ പോലെയാണിത്.

വിഡ്ഢിത്തം നിറഞ്ഞ വാര്‍ത്തകള്‍ ഷെയര്‍ ചെയ്യുന്നത് ദയവ് ചെയ്ത് അവസാനിപ്പിക്കൂ. മാനസിക സ്ഥിരതയില്ലാത്ത ആരുടേയോ ചിന്തയില്‍ ഉണ്ടായ കള്ളക്കഥയാണ് ഇത്. മൃദംഗം വിദ്വാന്‍ വി ബാലാജിയുടെ കുടുംബാംഗം കൂടിയാണ് യുവതി. ചിന്മയി പറയുന്നു.


ഫോട്ടോക്കെതിരെ ബാലാജിയും ഫെയ്‌സ്ബുക്കില്‍ രംഗത്തെത്തി. എന്റെ അനന്തരവളാണ് ദിവ്യ. കഴിഞ്ഞ വര്‍ഷവും ചിത്രം വ്യാപകമായി പ്രചരിച്ചിരുന്നു. ചിത്രം നീക്കം ചെയ്യാന്‍ ഫെയ്‌സ്ബുക്കിനെ സമീപിച്ചിരുന്നു.

അപകീര്‍ത്തികരമായി ഒന്നുമില്ലെന്നും കിവംദന്തികള്‍ വൈകാതെ അവസാനിക്കുമെന്നാണ് അന്ന് ഫെയ്‌സ്ബുക്ക് അധികൃതര്‍ പറഞ്ഞത്. എന്നാല്‍ വ്യാജ പ്രചരണം വീണ്ടും ആവര്‍ത്തിച്ചു. അതില്‍ തന്റെ സഹോദരനും ദിവ്യയും വലിയ ആശങ്കയിലാണെന്നും അദ്ദേഹം പ്രതികരിച്ചു.

ജീവിച്ചിരുന്ന കാലത്ത് തന്നെ ജയലളിതയ്‌ക്കെതിരെ നിരവധി വ്യാജ പ്രചരണങ്ങള്‍ നടന്നിരുന്നു. ജയലളിതയുടെ ദത്തുപുത്രനായ സുധാകരന്‍ ശരിക്കും ഉള്ള മകനാണെന്നായിരുന്നു ഒരു പ്രചരണം. എന്നാല്‍ തോഴി ശശികലയുടെ മരുമകനാണ് സുധാകരന്‍ എന്ന വസ്തുത പലര്‍ക്കും അറിയില്ല.

ജയലളിതയ്ക്കും തെലുങ്ക് സിനിമ താരം ആയിരുന്ന ശോഭന്‍ ബാബുവിനും ജനിച്ച മകളാണെന്ന് പറഞ്ഞാണ് ദിവ്യയുടെ ചിത്രം പ്രചരിക്കുന്നത്. ചിത്രത്തിലുള്ള യുവതിക്ക് ജയലളിതയുമായുള്ള സാമ്യം ചൂണ്ടിക്കാട്ടിയാണ് ഇത്തരത്തിലുള്ള പ്രചരണങ്ങള്‍ നടന്നത്. ശോഭന്‍ ബാബുവുമായി ജയലളിത പ്രണയത്തിലായിരുന്നു എന്ന ഗോസിപ്പുകള്‍ക്ക് പിന്നാലെയാണ് ഈ വാര്‍ത്ത.