നോട്ട് പിന്‍വലിക്കല്‍മൂലം സാധാരണക്കാരന്‍ നേരിടുന്ന പ്രതിസന്ധി മറികടക്കുന്നതിന് ഉടന്‍ 200 രൂപയുടെ നോട്ടുകള്‍ അച്ചടിക്കണമെന്നു കോണ്‍ഗ്രസ്. 2000 രൂപയുടെ നോട്ടുകള്‍ കള്ളപ്പണക്കാര്‍ക്കു മാത്രമേ പ്രയോജനപ്പെടുന്നുള്ളൂ. ഒരു കോടി രൂപയുടെ 1000 രൂപ നോട്ടുകള്‍ സൂക്ഷിക്കാവുന്ന സ്ഥലത്തു രണ്ടരക്കോടി രൂപയ്ക്കുള്ള 2000 രൂപ നോട്ടുകള്‍ ശേഖരിച്ചുവയ്ക്കാം.

കള്ളപ്പണം ഇല്ലാതാക്കാനാണ് 500, 1000 രൂപ നോട്ടുകള്‍ പിന്‍വലിച്ചതെങ്കില്‍ 2000 രൂപ നോട്ടുകള്‍ പുറപ്പെടുവിച്ചതെന്തിനെന്നു സര്‍ക്കാര്‍ വിശദീകരിക്കണമെന്നു മുതിര്‍ന്ന നേതാവ് പൃഥ്വിരാജ് ചവാന്‍ ആവശ്യപ്പെട്ടു. യുപി തിരഞ്ഞെടുപ്പു മുന്നില്‍ക്കണ്ടു നടത്തിയ മിന്നലാക്രമണമായിരുന്നു നോട്ടു പിന്‍വലിക്കലെന്ന സംശയം സ്ഥിരീകരിക്കപ്പെട്ടിരിക്കുകയാണെന്നു കോണ്‍ഗ്രസ് വൃത്തങ്ങള്‍ പറഞ്ഞു.

കോണ്‍ഗ്രസ് ഉള്‍പ്പെടെ എല്ലാ രാഷ്ട്രീയ പാര്‍ട്ടികളും തുടക്കത്തില്‍ നോട്ട് പിന്‍വലിക്കലിനെ അനുകൂലിച്ചത് അതിന്റെ പ്രഖ്യാപിത ലക്ഷ്യങ്ങള്‍ വിശ്വസിച്ചാണ്. എന്നാല്‍, അതിലെ പൊള്ളത്തരം ഇപ്പോള്‍ വെളിപ്പെട്ടിരിക്കുന്നു - കോണ്‍ഗ്രസ് കുറ്റപ്പെടുത്തി.