എല്ലായിടത്തും ഇന്റര്‍നെറ്റ് ഇഴയുന്നു. തമിഴ്‌നാട്ടില്‍ കനത്ത നാശനഷ്ടം വിതച്ച വര്‍ധ ചുഴലിക്കാറ്റിനെ തുടര്‍ന്നാണ് രാജ്യത്തെ ഇന്റര്‍നെറ്റ് സംവിധാനങ്ങള്‍ തകരാറിലായത്. പലയിടത്തും നെറ്റിന്റെ വേഗത തീരെകുറഞ്ഞു. ചുഴലിക്കാറ്റിന് പിന്നാലെ സമുദ്രാന്തര്‍ ഭാഗത്തെ കേബിള്‍ സംവിധാനത്തിലുണ്ടായ തകരാറുകള്‍ മൂലമാണ് ഇന്റര്‍നെറ്റ് സേവനങ്ങളുടെ വേഗത കുറഞ്ഞതെന്നാണ് ഇന്റര്‍നെറ്റ് സേവനദാതാക്കളുടെ വിശദീകരണം. 

തകരാര്‍ പരിഹരിക്കാന്‍ സാങ്കേതിക വിദഗ്ദര്‍ പരിശ്രമിച്ചു കൊണ്ടിരിക്കുകയാണെന്നും പറയുന്നു. സേവനങ്ങള്‍ പൂര്‍ണ സജ്ജമാകാന്‍ സമയമെടുക്കുമെന്നാണ് ഇവര്‍ നല്‍കുന്ന വിശദീരണം.

പ്രമുഖ ടെലികോം കമ്പനികളെല്ലാം ഇതു സംബന്ധിച്ച് വിശദീകരണം ഇറക്കിയിട്ടുണ്ട്. ചെന്നൈ തീരത്ത് വീശിയടിച്ച വര്‍ധ ചുഴലിക്കാറ്റ് മൂലം ഒപ്റ്റിക്കല്‍ ഫൈബര്‍ സംവിധാനത്തില്‍ തകരാര്‍ സംഭവിച്ചിട്ടുണ്ടെന്നും അതിനാല്‍ ഇന്റര്‍നെറ്റ് സേവനങ്ങളുടെ വേഗതയെ ഇത് ബാധിക്കുമെന്നുമാണ് കമ്പനികളുടെ വിശദീകരണ കുറിപ്പില്‍ പറയുന്നത്. 
ചെന്നൈയിലും മുബൈയിലുമാണ് രാജ്യത്തെ ഇന്റര്‍നെറ്റ് സേവനങ്ങള്‍ നിയന്ത്രിക്കുന്ന രണ്ട് പ്രധാന കേന്ദ്രങ്ങള്‍ സ്ഥിതി ചെയ്യുന്നത്.