രാജ്യത്തെ കറന്‍സി നോട്ടുകളുടെ ക്ഷാമം പൂര്‍ണ്ണമായും പരിഹരിക്കണമെങ്കില്‍ 2017 ആഗസ്‌ററ് മാസം വരെയെങ്കിലും കാത്തിരിക്കേണ്ടി വരും. അസാധുവാക്കിയ നോട്ടുകള്‍ക്കു പകരം 14 ലക്ഷം കോടി രൂപയുടെ പുതിയ നോട്ടുകള്‍ അച്ചടിച്ചു വിതരണം ചെയ്യാന്‍ ചുരുങ്ങിയത് എട്ട് മാസമെങ്കിലും എടുക്കുമെന്ന് റിസര്‍വ് ബാങ്ക് ഓഫ് ഇന്ത്യയുടെ കണക്കുകള്‍ തന്നെ വ്യക്തമാക്കുന്നു.

1. റിസര്‍വ്വ് ബാങ്കിന് നാല് കറന്‍സി പ്രസുകളാണ് ആകെയുള്ളത്.

2. ഒരു വര്‍ഷം 2,670 കോടി രൂപയുടെ കറന്‍സികള്‍ മാത്രം അച്ചടിക്കാന്‍ മാത്രമേ ഈ പ്രസുകള്‍ക്കു കഴിയൂ എന്ന് റിസര്‍വ്വ് ബാങ്കിന്റെ ഈ വര്‍ഷത്തെ വാര്‍ഷിക റിപ്പോര്‍ട്ടില്‍ പറയുന്നു.

3. ഈ നാല് കറന്‍സി പ്രസ്സുകള്‍ക്കും കൂടി ഇതുവരെ പുറത്തിറക്കാന്‍ കഴിഞ്ഞതു 4.61 ലക്ഷം കോടി രൂപയുടെ നോട്ടുകള്‍ മാത്രമാണ്.

4. ഇതുവരെ ബാങ്കുകളില്‍ തിരിച്ചെത്തിയ 12.44 ലക്ഷം കോടി രൂപയ്ക്കു തുല്യമായ പുതിയ നോട്ടുകള്‍ ഏതായാലും അച്ചടിക്കേണ്ടി വരും. അസാധുവാക്കിയ നോട്ടുകള്‍ ഇനിയും കുറച്ചുകൂടി ബാങ്കുകളിലെത്തുകയാണെങ്കില്‍ 15.44 ലക്ഷം കോടി രൂപയുടെ പുതിയ നോട്ടുകള്‍ ഇറക്കേണ്ടി വരും.

5. അഥവാ 12.44 ലക്ഷം കോടി നോട്ടുകളാണു പുറത്തിറക്കേണ്ടതെങ്കിലും ഇനിയും 7.83 ലക്ഷം കോടി നോട്ടുകള്‍ കൂടി അച്ചടിക്കണം.

6. അഞ്ഞൂറിന്റെ നോട്ടുകള്‍ വളരെ കുറച്ചേ അച്ചടിച്ചിട്ടുള്ളൂ. അതാണ് ഇപ്പോള്‍ അനുഭവപ്പെടുന്ന നോട്ട് ക്ഷാമത്തിനു മുഖ്യകാരണം.

7. രാജ്യത്തു 2.15 ലക്ഷം എടിഎമ്മുകളാണുള്ളത്. ഇവയില്‍ 1,38,626 എണ്ണവും നഗരങ്ങളിലാണ്. ഗ്രാമങ്ങളില്‍ 47,443 എണ്ണമേയുള്ളൂ. 2.15 ലക്ഷം എടിഎമ്മുകളില്‍ മുപ്പതിനായിരം എണ്ണം മാത്രമേ ഇപ്പോള്‍ പ്രവര്‍ത്തിക്കുന്നുള്ളൂ. ഇവ എല്ലാസമയവും പ്രവര്‍ത്തിക്കുന്നുമില്ല.

8. ഈ എടിഎമ്മുകള്‍ പ്രവര്‍ത്തനക്ഷമമാകണമെങ്കില്‍ 500 രൂപയുടെ നോട്ടുകള്‍ ആവശ്യത്തിനു ലഭിക്കണം. ഒപ്പം നൂറുരൂപ നോട്ടുകളും വേണം.

9. ഇതുവരെ പുതിയ 500 രൂപയുടെ 10 കോടി നോട്ടുകളേ പുറത്തിറക്കിയിട്ടുള്ളൂ എന്നാണു റിസര്‍വ് ബാങ്ക് വൃത്തങ്ങള്‍ പറയുന്നത്. എടിഎമ്മുകള്‍ സാധാരണ നിലയില്‍ പ്രവര്‍ത്തിക്കാനും ബാങ്കുകളില്‍ കറന്‍സി ക്ഷാമം അനുഭവപ്പെടാതിരിക്കാനും 681 കോടി എണ്ണം 500 രൂപ നോട്ടുകളാണു വേണ്ടത്.

10. രാജ്യത്തെ നാലു കറന്‍സി പ്രസ്സുകളും മൂന്നു ഷിഫ്റ്റ് വീതം പ്രവര്‍ത്തിച്ചാല്‍ തന്നെ ഒരുദിവസം 5.56 കോടി 500 രൂപ നോട്ടുകളേ പുറത്തിറക്കാന്‍ സാധിക്കുകയുള്ളൂ.

11. 681 കോടി 500 രൂപ നോട്ടുകള്‍ പുറത്തിറക്കാന്‍ കുറഞ്ഞതു 122 ദിവസമെങ്കിലും വേണ്ടിവരും. അതായത് 2017 ഏപ്രിലിനു മുന്‍പ് ഇത്രയും അച്ചടിച്ചു തീര്‍ക്കാനാവില്ല.

12. അസാധുവാക്കിയ മുഴുവന്‍ തുകയുടെയും (2000 നോട്ടുകളുടെ മൂല്യം കിഴിച്ചാല്‍) 500 രൂപ നോട്ടുകള്‍ പുറത്തിറക്കണമെങ്കില്‍ 1181 കോടി നോട്ടുകള്‍ അച്ചടിക്കണം. അതിനും ഇന്നത്തെ നിലയ്ക്കു 212 ദിവസം വേണ്ടിവരും.