നവവധുവിനെ തോക്ക് ചൂണ്ടി ഭീഷണിപ്പെടുത്തി ഭര്‍ത്താവും രണ്ട് സുഹൃത്തുക്കളും കൂട്ടബലാത്സംഗം ചെയ്തു. ജാര്‍ഖണ്ഡിലെ പലമോ ജില്ലയിലെ റഹയ ഗ്രാമത്തിലാണ് സംഭവം. ഈയടുത്താണ് ഇവരുടെ വിവാഹം നടന്നതെന്ന് ഡെപ്യൂട്ടി സൂപ്രണ്ട് ഹിരാലാല്‍ രവി പറഞ്ഞു. ബുധനാഴ്ച രാത്രി ബബ്ലു സിംഗ്, അഫ്‌സല്‍ മിയാന്‍ എന്നീ സുഹൃത്തുക്കളെ കൂട്ടിയാണ് ഭര്‍ത്താവ് വീട്ടിലെത്തിയത്. ഇയാള്‍ ഭാര്യയെ പീഡിപ്പിച്ച ശേഷമാണ് സുഹൃത്തുക്കളും പീഡിപ്പിച്ചത്. പിന്നീട് പീഡനത്തിന്റെ ദൃശ്യങ്ങള്‍ പുറത്തുവിടുമെന്നും ഇവര്‍ ഭീഷണി മുഴക്കിയതായി യുവതി പോലീസില്‍ നല്‍കിയ പരാതിയില്‍ പറയുന്നു. 

പിറ്റേദിവസം രാവിലെ സ്വന്തം വീട്ടിലേക്ക് പോയി യുവതി മാതാപിതാക്കളോട് വിവരം പറയുകയും പോലീസില്‍ പരാതി നല്‍കുകയുമായിരുന്നു. എന്നാല്‍ പോലീസ് ആദ്യം കേസ് രജിസ്റ്റര്‍ ചെയ്തില്ല. പിന്നീട് ഉന്നത ഉദ്യോഗസ്ഥര്‍ ഇടപെട്ടാണ് കേസെടുത്തത്.