തീയറ്ററുകളിലെ നിര്‍ബന്ധിത ദേശീയ ഗാനാലാപനത്തിനെതിരെ രൂക്ഷ വിമര്‍ശനവുമായി തെലുങ്ക് സൂപ്പര്‍താരവും ജനസേനാ പാര്‍ട്ടി അദ്ധ്യക്ഷനുമായ പവന്‍ കല്യാണ്‍. ദേശീയ ഗാനം തിയ്യേറ്ററുകളില്‍ കേള്‍പ്പിച്ച് ദേശസ്‌നേഹം കാണിക്കേണ്ടി വരുന്നത് അപഹാസ്യമാണെന്ന് താരം വിമര്‍ശിക്കുന്നു. ട്വിറ്ററിലൂടെയാണ് താരം തന്റെ നിലപാട് വ്യക്തമാക്കിയത്.

ഒരു സാധാരണ സായാഹ്നത്തില്‍ കുടുംബത്തോടൊപ്പവും കൂട്ടുകാരോടൊപ്പവും സിനിമ കാണാനെത്തുമ്‌ബോഴല്ല ദേശസ്‌നേഹം പരിശോധിക്കേണ്ടത് എന്നാണ് ഒരു ട്വീറ്റ്. സുപ്രീം കോടതിയെ വിധിയെ പൂര്‍ണ്ണമായും എതിര്‍ക്കുന്നതാണ് പവന്‍ കല്യാണിന്റെ ട്വീറ്റുകളുടെ ഉള്ളടക്കം. എന്തുകൊണ്ട് രാഷ്ട്രീയ പാര്‍ട്ടികള്‍ ദേശീയ ഗാനം ആലപിക്കാതെ തിയറ്ററുകളില്‍ മാത്രം വേണമെന്ന് പറയുന്നു.

എന്തു കൊണ്ട് രാജ്യത്തെ മറ്റ് പ്രധാനപ്പെട്ട ഓഫീസുകളിലൊന്നും ഇത് നടപ്പിലാക്കുന്നില്ല. നിയമം നടപ്പിലാക്കുന്നവര്‍ക്ക് സ്വന്തം സ്ഥലങ്ങളില്‍ നടപ്പിലാക്കി മാതൃക കാണിച്ചു കൂടേയെന്നും പവന്‍ കല്യാണ്‍ ചോദിക്കുന്നു. ഭരിക്കുന്ന പാര്‍ട്ടിക്ക് എതിരായി പറയുന്നതെല്ലാം ദേശദ്രോഹമാണെന്ന് പറയുന്നത് ജനാധിപത്യത്തിന് യോജിച്ചതല്ലെന്നും പവന്‍ കല്യാണ്‍ പറഞ്ഞു. മനുഷ്യത്വ മൂല്യങ്ങളിലാണ് ദേശീയത കുടികൊള്ളുന്നതെന്നും അത് പ്രകൃതിയിലുണ്ടെന്നും പവന്‍ കല്യാണ്‍ കൂട്ടിച്ചേര്‍ത്തു.