റോഡപകടത്തില്‍ മരിച്ചയാളെ തിരിഞ്ഞു നോക്കാതെ മന്ത്രി വാഹനം വിട്ടു പോയി. തെലുങ്കാനയിലാണ് സംഭവം. വാഹനമിടിച്ച് വഴിയില്‍ മരിച്ച് കിടക്കുന്നയാളെ തിരിഞ്ഞു നോക്കാതെ മന്ത്രി കടന്നു പോകുന്നതിന്റെ ചിത്രം സോഷ്യല്‍ മീഡിയയില്‍ വൈറലായി. ഞായറാഴ്ച ഉച്ചകഴിഞ്ഞ് ജയശങ്കര്‍ ഭൂലാപ്പള്ളി ജില്ലയിലായിരുന്നു സംഭവം. തദൂനി മധുസൂധനചാരി എന്ന യുവാവാണ് അപകടത്തില്‍ മരിച്ചത്.

സുഹൃത്തുക്കള്‍ക്കൊപ്പം സൈക്കിളില്‍ സഞ്ചരിക്കുകയായിരുന്ന മദുസൂധന ഒരു ടാറ്റ ഏസ് ട്രക്കുമായി കൂട്ടിയിടിക്കുകയായിരുന്നു. ഇയാള്‍ സംഭവ സ്ഥലത്ത് വച്ച് തന്നെ മരിച്ചു. അപകടത്തില്‍പ്പെട്ടവരെ ആശുപത്രിയില്‍ എത്തിക്കുന്നതിന് വാഹനം അന്വേഷിക്കവെയാണ് ആദിവാസി ക്ഷേമ വകുപ്പ് മന്ത്രി അസ്മീറ ചന്തുലാലിന്റെ വാഹനവ്യൂഹം അതുവഴി കടന്നു വന്നത്.

ഔദ്യോഗിക വാഹനത്തിന്റെ മുന്‍ സീറ്റില്‍ തന്നെ മന്ത്രി ഉണ്ടായിരുന്നു. എന്നാല്‍ അപകടം കണ്ടിട്ടും മന്ത്രി കാര്‍ നിര്‍ത്താന്‍ തയ്യാറായില്ല. താന്‍ പ്രതിനിധീകരിക്കുന്ന മുളുഗു നിയോജക മണ്ഡലത്തിലാണ് അപകടമുണ്ടായത്. എന്നിട്ടും വാഹനം നിര്‍ത്താനോ അപകടത്തില്‍പ്പെട്ടയാളെ സഹായിക്കാനോ മന്ത്രി സുമനസ് കാണിച്ചില്ല. പിന്നീട് സംഭവസ്ഥലത്ത് എത്തിയ പോലീസാണ് മൃതദേഹം മാറ്റാനും പരുക്കേറ്റ രണ്ട് പേരെ ആശുപത്രിയില്‍ പ്രവേശിപ്പിക്കാനും തയ്യാറായത്.

അതേസമയം സംഭവ സമയത്ത് താന്‍ തിരക്കിലായിരുന്നെന്ന് മന്ത്രി പറഞ്ഞു. താന്‍ പാലംപേട്ടില്‍ ബന്ധുക്കളെ കാണാന്‍ പോകുകയായിരുന്നെന്നും മന്ത്രി കൂട്ടിച്ചേര്‍ത്തു. തിരക്കിലല്ലായിരുന്നെങ്കില്‍ താന്‍ വാഹനം നിര്‍ത്തുമായിരുന്നെന്നും മന്ത്രി പറഞ്ഞു.