പനീര്ശെല്വം രാജിയിലേയ്ക്ക്; ചിന്നമ്മ മുഖ്യമന്ത്രിയാകും
അന്തരിച്ച തമിഴ്നാട് മുഖ്യമന്ത്രി ജയലളിതയുടെ വിയോഗത്തെ തുടര്ന്ന് മുഖ്യമന്ത്രി സ്ഥാനത്ത് എത്തിയ പനീര് ശെല്വം സ്ഥാനം രാജിവെച്ചേക്കുമെന്ന് സൂചന. പനീര്ശെല്വത്തിന്റെ രാജിയോടെ ജയലളിതയുടെ തോഴി ശശികല നടരാജന് മുഖ്യമന്ത്രി സ്ഥാനത്ത് എത്തുമെന്നാണ് നിലവിലെ റിപ്പോര്ട്ടുകള്.
അമ്മയുടെ പിന്ഗാമിയാകാന് ചിന്നമ്മയ്ക്ക് യോഗ്യതയുണ്ടെന്നാണ് പാര്ട്ടിയിലെ ഒരു വിഭാഗത്തിന്റെ നിലപാട്. അതിനാല്, പാര്ട്ടി ജനറല് സെക്രട്ടറി സ്ഥാനത്തിന് പുറമേ തമിഴ്നാട് മുഖ്യമന്ത്രി സ്ഥാനവും നേടാന് ശശികല തന്റെ അനുകൂലികളുടെ സഹായം അഭ്യര്ത്ഥിച്ചതായും റിപ്പോര്ട്ടുണ്ട്.
ശശികല മുഖ്യമന്ത്രി സ്ഥാനത്തേയ്ക്ക് വരണമെന്ന് അണ്ണാ ഡിഎംകെ യുവജന സംഘടനകളും ആവശ്യപ്പെട്ടിരുന്നു. എന്നാല്, ജയലളിതയുടെ മരണത്തിന് തൊട്ടു പിന്നാലെ മുഖ്യമന്ത്രി സ്ഥാനത്തേയ്ക്ക് വരുന്നത് നിലവിലെ പ്രതിഷേധങ്ങള് കടുപ്പിക്കാന് ഇടയാകുമെന്ന ഭയവും ശശികലയ്ക്ക് ഉണ്ട്. അതേസമയം, ജയലളിതയുടെ മരണത്തെ തുടര്ന്ന് ആര്.കെ നഗറില് നടക്കുന്ന ഉപതെരഞ്ഞെടുപ്പില് ജനവിധി തേടി വിജയിച്ചാല് മുഖ്യമന്ത്രിസ്ഥാനം ശശികലയ്ക്ക് അകലെയല്ല. ഇക്കാര്യം കണക്കിലെടുത്ത് ശശികലയെ ആര്.കെ നഗറില് മത്സരിപ്പിക്കാനുള്ള നീക്കവും അനുയായികള്ക്കിടയില് ഉണ്ട്.
https://www.facebook.com/Malayalivartha
