പ്രധാനമന്ത്രിക്കെതിരെ അഴിമതി ആരോപണവുമായി രാഹുല് ഗാന്ധി
പ്രധാനമന്ത്രിക്കെതിരെ കോടികളുടെ അഴിമതി ആരോപണവുമായി കോണ്ഗ്രസ് ഉപാധ്യക്ഷന് രാഹുല് ഗാന്ധി. സഹാറ ഗ്രൂപ്പില് നിന്നും മോഡി കോടികള് കോഴ വാങ്ങിയെന്നാണ് രാഹുലിന്റെ ആരോപണം. ഐടി രേഖകള് ഇതിന് തെളിവായുണ്ട്. 2013ല് ഇരുപത് കോടി രൂപയും 2014ല് പതിനഞ്ച് കോടിയും മോഡി കോഴയായി വാങ്ങിയെന്നാണ് രാഹുലിന്റെ ആരോപണം. ഒമ്പത് തവണയായാണ് മോഡി കോഴ വാങ്ങിയത്. മോഡി സര്ക്കാരിന്റെ നോട്ട് അസാധുവാക്കല് തീരുമാനം സത്യസന്ധരായ പൗരന്മാര്ക്ക് നേരെയുള്ള ആക്രമണമാണ്.
അഴിമതി തൂത്തെറിയാന് മോഡി സര്ക്കാര് എന്തെങ്കിലും നടപടി സ്വീകരിച്ചാല് ചെറുതോ വലുതോ എന്ന് നോക്കാതെ അതിനെ കോണ്ഗ്രസ് പിന്തുണക്കും. എന്നാല് നോട്ടുനിരോധനം കള്ളപ്പണത്തിനും അഴിമതിക്കുമെതിരല്ല. തീരുമാനം രാജ്യത്തെ സത്യസന്ധരായ ദരിദ്രജനവിഭാഗത്തിന് നേരെയുള്ള ആക്രമണമാണെന്നും രാഹുല് കുറ്റപ്പെടുത്തി.
എല്ലാ പണവും കള്ളപ്പണമല്ല, കള്ളപ്പണമെല്ലാം ഇരിക്കുന്നത് പണമായുമല്ല. ആറ് ശതമാനം കള്ളപ്പണം മാത്രമാണ് പണമായിട്ടുള്ളത്. മോഡിജി നിങ്ങള് സര്ജിക്കല് സ്ട്രൈക്കല്ല നടത്തിയത് മറിച്ച് രാജ്യത്തെ പാവപ്പെട്ടവരുടെ മേല് ബോംബ് വര്ഷിക്കുകയാണ് ചെയ്തത്. ഒരു കര്ഷകന് വിത്തുകള് ചെക്ക് വഴിയോ കാര്ഡ് വഴിയോ വാങ്ങാന് സാധിക്കില്ല. അതിന് പണം തന്നെ വേണം. നിങ്ങള് അവരുടെ കയ്യില് നിന്നും പണം കവര്ന്നെടുത്തു. ബാങ്കില് നിന്നുമെടുത്ത വായ്പകള് കര്ഷകരോ ഇടത്തരക്കാരോ അടച്ചില്ലെങ്കില് അവരെ തടവിലാക്കും. എന്നാല് ധനികര് വായ്പ തിരിച്ചടച്ചില്ലെങ്കില് അവരെ കള്ളന്മാരെന്ന് വിളിക്കില്ല. മോഡി സര്ക്കാരിന് അവര് വീഴ്ച്ച വരുത്തിയവര് മാത്രമാണെന്നും രാഹുല് പറഞ്ഞു.
സ്വിസ്റ്റര്ലന്ഡ് സര്ക്കാര് കള്ളപ്പണക്കാരുടെ വിവരങ്ങള് മോഡി സര്ക്കാരിന് അയച്ചുകൊടുത്തിട്ടുണ്ട്. ആ പേരുകള് പുറത്തുവിടാന് മോഡി ഇതുവരെ തയ്യാറായിട്ടില്ല. അവരെ രക്ഷിക്കാനാണ് മോഡിയുടെ ശ്രമമെന്നും രാഹുല് ആരോപിച്ചു. നോട്ട് അസാധുവാക്കല് സമ്പൂര്ണ പരാജയമാണ്. മോഡി രാജ്യത്തെ ജനങ്ങളെ ഒരു ശതമാനം ധനികരും 99 ശതമാനം പാവങ്ങളുമായി വിഭജിച്ചു. മോഡി സര്ക്കാരിന് കീഴില് രാജ്യത്തെ ദലിത് ജനത ഭീതിയിലാണ് കഴിയുന്നതെന്നും രാഹുല് പറഞ്ഞു.
https://www.facebook.com/Malayalivartha
