ഇന്ത്യന്‍ സിനിമാലോകത്തെ അത്ഭുതപ്പെടുത്തിയ ബ്രഹ്മാണ്ഡ ചിത്രം ബാഹുബലിയുടെ രണ്ടാം ഭാഗത്തിനുശേഷം മറ്റൊരു സ്വപ്നതുല്ല്യായ പ്രോജക്ടില്‍ സജീവമാവുകയാണ് സംവിധായകന്‍ എസ്. എസ്. രാജമൗലി. ഒരു വെറും സിനിമയല്ല. ഒരു സംസ്ഥാനത്തിന്റെ തലസ്ഥാനം തന്നെയാണ് രാജമൗലിയുടെ ഭാവനയില്‍ യാഥാര്‍ഥ്യമാവാന്‍ പോകുന്നത്. ആന്ധ്രപ്രദേശിന്റെ പുതിയ തലസ്ഥാനമായ അമരാവതി രൂപകല്‍പ്പന ചെയ്യാന്‍ സംസ്ഥാന സര്‍ക്കാര്‍ രാജമൗലിയുടെ സഹായം തേടിയിരിക്കുകയാണ്.

മുഖ്യമന്ത്രിയുടെ നിര്‍ദ്ദേശം രാജമൗലി തുടക്കത്തില്‍ നിരസിച്ചെങ്കിലും പിന്നീട് അദ്ദേഹം പദ്ധതിയുടെ ഭാഗമാകാമെന്ന് സമ്മതിക്കുകയായിരുന്നു. ബാഹുബലി രണ്ടാം ഭാഗം പുറത്തിറങ്ങിയതിനുശേഷമായിരിക്കും രാജമൗലി അമരാവതിയുടെ പണിപ്പുരയിലേക്ക് പ്രവേശിക്കുക.

ലണ്ടന്‍ ആസ്ഥാനമായിട്ടുള്ള ഫോസ്റ്ററാണ് ദൗത്യത്തില്‍ സര്‍ക്കാരുമായി സഹകരിക്കുന്നത്. ഇംപീരിയല്‍ വാര്‍ മ്യൂസിയം (ലണ്ടന്‍), 50 യുന്‍ പ്ലാസ, സെഞ്ച്വറി ടവര്‍ (ജപ്പാന്‍), സൈബര്‍ പോര്‍ട്ട് (ചൈന), ദ ഇന്‍ഡക്‌സ് (യുഎസ്) എന്നിങ്ങനെ വിശ്വപ്രസിദ്ധമായ പല നിര്‍മിതികള്‍ക്കും പിന്നില്‍ ഫോസ്റ്ററാണ് പ്രവര്‍ത്തിച്ചിട്ടുള്ളത്. അമരാവതി രൂപ കല്‍പ്പന ചെയ്യാന്‍ ഫോസ്റ്ററിലെ വിദഗ്ധ സംഘം മുഖ്യമന്ത്രിയുടെ നിര്‍ദ്ദേശ പ്രകാരം രാജമൗലിയെ നേരിട്ടു കണ്ട് ചര്‍ച്ച നടത്തിയിരുന്നു.

ബാഹുബലിക്കുവേണ്ടി രാജമൗലി രൂപകല്‍പ്പന ചെയ്ത മഹിഷ്മതിയെന്ന പ്രാചീന സാമ്രാജ്യത്തിന്റെ സെറ്റ് ഏറെ ശ്രദ്ധ നേടിയിരുന്നു. ഇതേ മാതൃകയില്‍ ഒരുപാട് ചരിത്ര പ്രധാന്യമുള്ള അമരാവതിയുടെ പഴമ നിലനിര്‍ത്തിക്കൊണ്ടുള്ള ഒരു പ്ലാനാണ് ആന്ധ്ര സര്‍ക്കാര്‍ വിഭാവനം ചെയ്തിരിക്കുന്നത്. നഗരം പുതുക്കിപ്പണിയുന്നതിനുള്ള രൂപരേഖ നിരവധി അന്താരാഷ്ട്ര കണ്‍സല്‍ട്ടന്റുകള്‍ സംസ്ഥാന സര്‍ക്കാരിന് മുന്‍പില്‍ അവതരിപ്പിച്ചിരുന്നെങ്കിലും അവയ്‌ക്കൊന്നും ഒരു ഇന്ത്യന്‍ സ്പര്‍ശം ഉണ്ടായിരുന്നില്ല. തുടര്‍ന്നാണ് മുഖ്യമന്ത്രി ചന്ദ്രബാബു നായിഡു രാജമൗലിയെ സമീപിക്കുന്നത്.