വെല്‍കം ഓഫര്‍ നീട്ടനുള്ള തീരുമാനത്തില്‍ റിലയന്‍സ് ജിയോയോട് ടെലികോം റെഗുലേറ്ററി അതോറിറ്റി വിശദീകരണം ചോദിച്ചു. ഡിസംബര്‍ 20ന് ഇതു സംബന്ധിച്ച് ട്രായ് ജിയോയോട് വിശദീകരണമാരാഞ്ഞ് കത്തയച്ചതായാണ് വിവരം. 2016 ഡിസംബര്‍ 31 വരെ പൂര്‍ണ്ണമായ സൗജന്യമായിരുന്നു ജിയോ ഉപഭോക്താകള്‍ക്ക് നല്‍കിയത്. എന്നാല്‍ പിന്നീട് ഇത് മാര്‍ച്ച് 31 വരെ റിലയന്‍സ് നീട്ടി നല്‍കുകയായിരുന്നു. ഡിസംബര്‍ 1നായിരുന്നു ഇത് സംബന്ധിച്ച പ്രഖ്യാപനം.

നിലവിലെ നിയമമനുസരിച്ച് 90 ദിവസം മാത്രമേ ഇത്തരം ഓഫറുകള്‍ മൊബൈല്‍ കമ്പനികള്‍ക്ക് ഉപഭോക്തകള്‍ക്കായി നല്‍കാന്‍ സാധിക്കുകയുള്ളു എന്നാണ് സൂചന. മറ്റ് മൊബൈല്‍ സേവനദാതാക്കള്‍ നേരത്തെ തന്നെ ജിയോയുടെ സൗജന്യ സേവനം അവസാനിപ്പിക്കണമെന്ന് ആവശ്യപ്പെട്ട് ട്രായിയെ സമീപിച്ചിരുന്നെങ്കിലും ട്രായ് ആവശ്യം തള്ളിയിരുന്നു. ജിയോക്ക് ഇന്റര്‍കോം കണക്ഷന്‍ ലഭ്യമാക്കത്തതിന് എയര്‍ടെല്‍, വോഡഫോണ്‍, ഐഡിയ തുടങ്ങിയ മൊബൈല്‍ സേവനദാതാക്കള്‍ക്ക് ട്രായ് പിഴയും ചുമത്തിയിരുന്നു. എന്നാല്‍ ജിയോ ഉപഭോക്താക്കളുടെ എണ്ണം 63 മില്യണ്‍ വരെ എത്തിയിരിക്കുന്ന സമയത്തുള്ള ട്രായുടെ നടപടി കമ്പനിക്ക് തിരിച്ചടയുണ്ടാക്കുമെന്നാണ് സൂചന.