മഹാരാഷ്ട്രയില്‍ നിന്നും തീവ്രവാദ സംഘടനയായ ഐസിസിലേക്ക് പോയ ചെറുപ്പക്കാരന്‍ വധിക്കപ്പെട്ടു. മുംബൈ കല്യാണ്‍ സ്വദേശിയായ അമാന്‍ ടണ്ടേലാണ് കൊല്ലപ്പെട്ടത്. അമാന്‍ കൊല്ലപ്പെട്ടതായികഴിഞ്ഞ നവംബറില്‍ തന്നെ റിപ്പോര്‍ട്ട് ഉണ്ടായിരുന്നു. എന്നാല്‍ ഇത് സംബന്ധിച്ച സ്ഥിരീകരണം ഉണ്ടായത് ഇപ്പോഴാണ്.

നവംബര്‍ 29നായിരുന്നു അമാന്‍ ടണ്ടേല്‍ കൊല്ലപ്പെട്ടതായി മാധ്യമങ്ങള്‍ റിപ്പോര്‍ട്ട് ചെയ്തത്. അപ്പോള്‍ ഇന്ത്യയുടെ സുരക്ഷാ ഏജന്‍സികള്‍ വാര്‍ത്ത സ്ഥിരീകരിച്ചിരുന്നില്ല. ഇപ്പോള്‍ സിറിയയില്‍ നിന്നും ടണ്ടേലിന്റെ വീട്ടിലേക്ക് ഫോണ്‍ വിളിച്ച് മരണവാര്‍ത്ത അറിയിക്കുകയാണ് ഉണ്ടായത് എന്നാണ് റിപ്പോര്‍ട്ടുകള്‍.

അമാന്‍ ടണ്ടേല്‍ മരിച്ചത് നവംബര്‍ 26നായിരിക്കാം എന്നാണ് കരുതപ്പെടുന്നത്. നവംബര്‍ 28നാണ് ഒരു തുര്‍ക്കി പൗരന്‍ ടണ്ടേലിന്റെ വീട്ടിലേക്ക് വിളിച്ച് ഇക്കാര്യം അറിയിച്ചത്. ഡിസംബര്‍ 28ന് പല ഐസിസ് അനുകൂല സംഘടനകളും അമാന്‍ ടണ്ടേലിനെ രക്തസാക്ഷി എന്ന് വിശേഷിപ്പിക്കുന്നതായി റിപ്പോര്‍ട്ടുകള്‍ പുറത്തുവന്നു. സിറിയയില്‍ വെച്ചാണ് മരണം സംഭവിച്ചത് എന്നാണ് അറിയുന്നത്.

2015 ലാണ് ഐസിസില്‍ ചേരാനായി ടണ്ടേല്‍ സിറിയയിലേക്ക് പോയത്. അരീബ് മജീദ്, ഫഹദ് ശൈഖ്, സഹീം എന്നിവര്‍ക്കൊപ്പമായിരുന്നു ഇയാള്‍ നാടുവിട്ടത്. സഹീം മരിച്ചതായാണ് വിവരം. ഫഹദ് ശൈഖ് ഏതാനും മാസങ്ങള്‍ക്ക് മുമ്പ് വരെ വീട്ടുകാരെ വിളിക്കുകയും ജിഹാദ് ചെയ്യുന്നതില്‍ അതീവ സന്തുഷ്ടനാണ് എന്ന് അറിയിക്കുകയും ചെയ്തിരുന്നു.

മുംബൈ കല്യാണ്‍ സ്വദേശിയായ അരീബ് മജീദ് എന്ന 23 കാരന്‍ അധികം വൈകാതെ തിരിച്ചുവന്നു. ഐസിസില്‍ എന്താണ് സംഭവിക്കുന്നത് എന്നും എന്തിനാണ് താന്‍ ഐസിസ് വിട്ട് വന്നത് എന്നും ദേശീയ അന്വേഷണ ഏജന്‍സിയോട് അരീബ് പറഞ്ഞിരുന്നു. ഞെട്ടിപ്പിക്കുന്ന ആ കാര്യങ്ങള്‍ ഇങ്ങനെയൊക്കെയാണ്

ഐസിസ് തീവ്രവാദികള്‍ക്ക് ആകപ്പാടെ അറിയുന്ന രണ്ട് കാര്യങ്ങള്‍ കൊല്ലാനും സ്ത്രീകളെ ബലാത്സംഗം ചെയ്യാനുമാണെന്നാണ് ഐസിസ് ക്യാംപില്‍ നിന്നും ഇന്ത്യയിലേക്ക് തിരിച്ചെത്തിയ ശേഷം അരീബ് ദേശീയ അന്വേഷണ ഏജന്‍സിയോട് പറഞ്ഞത്. മൂന്ന് മാസത്തോളം ഐസിസ് ക്യാംപിലുണ്ടായിരുന്നു അരീബ്.

മജീദിനെ ഇന്ത്യയിലെത്തിക്കാന്‍ ഇയാളുടെ അച്ഛന്‍ ദേശീയ അന്വേഷണ ഏജന്‍സിയുടെ സഹായം തേടിയിരുന്നു. മുംബൈയില്‍ സിവില്‍ എഞ്ചിനീയറിംഗ് വിദ്യാര്‍ഥിയായിരുന്നു അരീബ്. ഇറാഖിലെ ഹിന്ദ് ക്യാംപിലായിരുന്നു അരീബ് മജീദ്. വിശുദ്ധയുദ്ധമാണ് ഐസിസ് നടത്തുന്നത് എന്ന് കരുതിയാണ് അരീബ് ഇറാഖിലേക്ക് വണ്ടി കയറിയത്.

അവിടെയെത്തിയപ്പോഴാണ് കാര്യങ്ങള്‍ പോകുന്നത് വേറെ വഴിക്കാണ് പോകുന്നത് എന്ന് മനസിലായത്. ഐസിസില്‍ ചേര്‍ന്ന് യുദ്ധം ചെയ്യാന്‍ ഇറാഖിലെത്തിയ അരീബിന് ആയുധമേന്താന്‍ പോലും കഴിഞ്ഞില്ല. ദൈവത്തിന് വേണ്ടി യുദ്ധം ചെയ്യാന്‍ ഐസിസില്‍ ചേര്‍ന്ന അരീബിന് കിട്ടിയ പണി നിര്‍മാണപ്രവര്‍ത്തനങ്ങളുടെ മേല്‍നോട്ടമായിരുന്നു.

യുദ്ധം ചെയ്യാന്‍ ഇന്ത്യക്കാര്‍ പോര എന്നതായിരുന്നത്രെ കാരണം. ശാരീരികമായി ഫിറ്റല്ലാത്ത ഇന്ത്യക്കാര്‍ എന്ത് യുദ്ധം ചെയ്യാന്‍. യുദ്ധം ചെയ്യാന്‍ ഒരു അവസരം വേണമെന്ന് ഞങ്ങള്‍ ആവശ്യപ്പെട്ടു. എന്നാല്‍ ഇതിന് വേണ്ടി നടത്തിയ ടെസ്റ്റില്‍ വിജയിക്കാനായില്ല. ഐസിസിന് വേണ്ടി വെബ്‌സൈറ്റുകള്‍ നിര്‍മിക്കാനായിരുന്നു എന്റെ കൂടെയുണ്ടായിരുന്ന മൂന്ന് പേരോട് ആവശ്യപ്പെട്ടത്.

കെട്ടിടം പണികളുടെ മേല്‍നോട്ടം വഹിച്ചു. ചിലപ്പോള്‍ യുദ്ധം ചെയ്യുന്നവര്‍ക്ക് വെള്ളം കൊണ്ടുകൊടുക്കാന്‍ പറയും. ഇത് മാത്രമല്ല, അവരുടെ ടോയ്‌ലെറ്റ് കഴുകിക്കുക കൂടി ചെയ്യുമായിരുന്നു. കൂടെയുള്ളവര്‍ക്ക് മുറിവേറ്റാല്‍ പോലും തിരിഞ്ഞുനോക്കാത്തവരാണ് ഐസിസുകാര്‍. വെടിവെപ്പ് പരിശീലനത്തിനിടെ പരിക്കേറ്റ അരീബിനെ നാല് ദിവസം കഴിഞ്ഞാണത്രെ ആശുപത്രിയില്‍ കൊണ്ടുപോയത്.

മുറിവേറ്റ എന്ന അവര്‍ സഹായിക്കും എന്ന് കരുതി. എന്നാല്‍ ആരും സഹായിച്ചില്ല. ദൈവത്തിന്റെ ജോലി ചെയ്യാന്‍ വേണ്ടിയാണ് ഞാന്‍ പോയത്. ഇന്ത്യ വിടുമ്പോള്‍ ഞാന്‍ കരുതിയത് സ്വര്‍ഗത്തിലേക്കാണ് പോക്ക് എന്നാണ്. എന്നാല്‍ നരകത്തിലെപ്പോലുള്ള നാറ്റമായിരുന്നു അവിടെ. ആരും ആര്‍ക്കുവേണ്ടിയും നില്‍ക്കില്ല. ക്രൂരത മാത്രമാണ് അവിടെ കാണാനുണ്ടായിരുന്നത്. - അരീബ് പറഞ്ഞു