സംസ്ഥാനത്തെ മൂന്ന് വലിയ ഗോള്‍ഡ് ലോണ്‍ കമ്പനികളുടെ വളര്‍ച്ച 195 ടണ്ണില്‍ നിന്ന് രണ്ട് വര്‍ഷത്തിനിടെ 263 ടണ്ണായി ഉയര്‍ന്നുവെന്നാണ് വേള്‍ഡ് ഗോള്‍ഡ് കൗണ്‍സിലിന്റെ കണ്ടെത്തല്‍. ഉയര്‍ന്ന സ്വര്‍ണ്ണ നിക്ഷേപമുള്ള സമ്പന്നരാജ്യങ്ങളുടെ സ്വര്‍ണ്ണ ശേഖരത്തെ മറികടന്നുവെന്നാണ് കണ്ടെത്തല്‍. ലോകത്ത് ഏറ്റവുമധികം സ്വര്‍ണ്ണ ഉപഭോഗമുള്ള രാജ്യങ്ങളില്‍ മുന്‍പന്തിയിലുള്ള രാജ്യമാണ് ഇന്ത്യ. എന്നാല്‍ ലോകത്ത് സ്വര്‍ണ്ണ നിക്ഷേപത്തില്‍ മുന്‍പന്തിയിലുള്ള രാജ്യങ്ങളെ പാടെ പിന്നിലാക്കിയാണ് കേരളത്തിലെ മൂന്ന് ഗോള്‍ഡ് ലോണ്‍ കമ്പനികളുടെ വളര്‍ച്ച. മുത്തൂറ്റ് ഫിനാന്‍സ്, മണപ്പുറം ഫിനാന്‍സ്, മുത്തൂറ്റ് ഫിന്‍കോര്‍പ്പ് എന്നിവര്‍ ചേര്‍ന്ന് 263 ടണ്ണിന്റെ സ്വര്‍ണ ശേഖരമാണുള്ളത്. ബെല്‍ജിയം, സിങ്കപ്പൂര്‍, സ്വീഡന്‍, ആസ്ട്രേലിയ എന്നീ രാജ്യങ്ങളുടെ സ്വര്‍ണ്ണ നിക്ഷേപത്തേക്കാള്‍ അധികമാണ്. 

ആഗോളതലത്തില്‍ സ്വര്‍ണ്ണശേഖരത്തിന്റെ 30 ശതമാനം ഇന്ത്യയിലാണുള്ളത്. മികച്ച നിക്ഷേപമായ സ്വര്‍ണ്ണ നിര്‍മ്മാണ വ്യവസായത്തില്‍ കേരളത്തില്‍ നിന്നുള്ള രണ്ട് ലക്ഷത്തോളം പേരാണ് തൊഴിലെടുക്കുന്നത്. കഴിഞ്ഞ രണ്ട് വര്‍ഷത്തിനിടെ മുത്തൂറ്റ് ഫിനാന്‍സ്, മണപ്പുറം ഫിനാന്‍സ്, മുത്തൂറ്റ് ഫിന്‍കോര്‍പ്പ് ഉള്‍പ്പെടെ മൂന്ന് ഗോള്‍ഡ് ലോണ്‍ കമ്പനികളുടെ സ്വര്‍ണ്ണ ശേഖരത്തില്‍ 116 ടണ്‍ മുതല്‍ 150 ടണ്ണിന്റെ വര്‍ധനവാണുണ്ടായിട്ടുള്ളത്. 

സ്വര്‍ണ്ണനിക്ഷേപമുള്ള രാജ്യങ്ങളുടെ പട്ടികയില്‍ മുന്‍പന്തിയില്‍ നില്‍ക്കുന്ന സിങ്കപ്പൂര്‍(127.4 ടണ്‍), സ്വീഡന്‍(125.7 ടണ്‍), ആസ്ട്രേലിയ(79.9 ടണ്‍), കുവൈത്ത്(79 ടണ്‍) എന്നീ രാജ്യങ്ങളെ പിന്തള്ളിയാണ് കേരളത്തിലെ മൂന്ന് ഗോള്‍ഡ് കമ്പനികളും സ്വര്‍ണ്ണ ശേഖരത്തില്‍ മുന്നിലെത്തിയിട്ടുള്ളത്. 

വേള്‍ഡ് ഗോള്‍ഡ് കൗണ്‍സിലിന്റെ കണക്ക് പ്രകാരം സ്വര്‍ണ്ണ നിക്ഷേപത്തില്‍ 558 ടണ്ണിന്റെ നിക്ഷേപവുമായി ഇന്ത്യ 11ാം സ്ഥാനത്താണുള്ളത്. ഒന്നാം സ്ഥാനത്ത് 8,134 ടണ്ണുമായി അമേരിക്ക ഒന്നാം സ്ഥാനത്തും 3, 378 ടണ്ണുമായി രണ്ടാം സ്ഥാനത്ത് ജര്‍മനിയും 2,814 ടണ്ണുമായി അന്താരാഷ്ട്ര നാണയ നിധി മൂന്നാം സ്ഥാനത്തുമാണുള്ളത്. ജിഎഫ്എംഎസ്സിന്റെ ഗോള്‍ഡ് സര്‍വ്വേ പ്രകാരം സ്വര്‍ണ്ണ ഉപഭോഗത്തില്‍ ഇന്ത്യയാണ് മുന്‍പന്തിയിലുള്ളത്. 2016ല്‍ 107.6 ടണ്‍ സ്വര്‍ണ്ണമാണ് ഇന്ത്യ ഉപയോഗിച്ചത്. യൂറോപ്പും വടക്കന്‍ അമേരിക്കയും 67.1 ടണ്‍ സ്വര്‍ണ്ണം മാത്രമാണ് ഇക്കാലയളവില്‍ ഉപയോഗിച്ചിട്ടുള്ളത്.