ഐ ടി നഗരമായ ബെംഗളൂരുവില്‍ പുതുവര്‍ഷപ്പുലരിയില്‍ സ്ത്രീകള്‍ വ്യാപകമായി അപമാനിക്കപ്പെട്ടതായി റിപോര്‍ട്ട്. എം ജി റോഡ്, ബ്രിഗേഡ് റോഡ് എന്നിവിടങ്ങളിലാണ് സ്ത്രീകള്‍ക്കെതിരെ അതിക്രമങ്ങള്‍ ഉണ്ടായത്. 'ബാംഗ്ലൂര്‍ മിറര്‍' ദിനപത്രമാണ് ഇത്തരത്തിലൊരു വാര്‍ത്ത ചിത്രം സഹിതം പ്രസിദ്ധീകരിച്ചത്.

അതിക്രമത്തിനിരയായ സ്ത്രീകള്‍ പോലീസിനോട് സഹായം തേടുന്നതിന്റെ ചിത്രമാണ് പത്രം വാര്‍ത്തയ്‌ക്കൊപ്പം പുറത്തുവിട്ടത്. സ്ത്രീകള്‍ക്കെതിരെ നടന്ന അതിക്രമങ്ങള്‍ക്ക് താന്‍ സാക്ഷിയാണെന്നും വാര്‍ത്ത റിപോര്‍ട്ട് ചെയ്ത ലേഖകന്‍ പറഞ്ഞു. പുതുവത്സരാഘോഷത്തിന്റെ ഭാഗമായി നൂറുകണക്കിന് പോലീസുകാരെയാണ് ഇവിടങ്ങളില്‍ നിയോഗിച്ചിരുന്നത്.

എന്നാല്‍ വലിയ ജനക്കൂട്ടത്തെ നിയന്ത്രിക്കാന്‍ പോലീസിന് കഴിയാത്ത അവസ്ഥയായിരുന്നു. സാമൂഹ്യ വിരുദ്ധരുടെ അതിക്രമം സഹിക്ക വയ്യാതെ ചിലര്‍ ചെരിപ്പൂരി കയ്യില്‍ പിടിച്ചാണ് പ്രതികരിച്ചതെന്നും റിപോര്‍ട്ടില്‍ വ്യക്തമാക്കുന്നു. അതേസമയം ഇതുസംബന്ധിച്ച് യാതൊരു പരാതിയും ലഭിച്ചിട്ടില്ലെന്നാണ് ബെംഗളൂരു സിറ്റി പോലീസ് പറയുന്നത്. ഇത്തരം സംഭവങ്ങള്‍ പതിവാണെന്നും അന്വേഷിക്കുമെന്നുമായിരുന്നു കര്‍ണാടക ആഭ്യന്തര മന്ത്രി ജി പരമേശ്വരയുടെ പ്രതികരണം.