ചുണ്ടില്‍ എരിയുന്ന സിഗററ്റും മടിയില്‍ ഷാംപെയ്‌നുമായി ശിവഭഗവാന്റെ ചിത്രം വിവാദമാകുന്നു. എല്‍റോ എന്ന പേരില്‍ ലോകത്ത് മുഴുവന്‍ നിശാപാര്‍ട്ടികളൊരുക്കുന്ന ബാഴ്‌സലോണ ക്ലബ്ബാണ് വിവാദത്തില്‍ കുടുങ്ങിയത്. മാഞ്ചസ്റ്ററില്‍ ബോളിവുഡ് പ്രമേയമാക്കി ഒരുക്കിയ വിരുന്നിനുവേണ്ടിയാണ് ശിവനെ ഈ രീതിയില്‍ അവര്‍ ചിത്രീകരിച്ചത്. എന്നാല്‍, ദൈവത്തെ അധിക്ഷേപിക്കുന്ന തരത്തിലുള്ള പ്രചരണം യുകെയിലെ ഹിന്ദുക്കളെ പ്രകോപിപ്പിച്ചു. സോഷ്യല്‍ മീഡിയയിലൂടെയും മറ്റും അവര്‍ ശക്തമായി പ്രതികരിച്ചപ്പോള്‍ എല്‍റോ തെറ്റ് മനസ്സിലാക്കി  ഖേദപ്രകടനം നടത്തി. ആല്‍ബര്‍ട്ട് ഹാളിലാണ് വിരുന്ന് നടക്കേണ്ടിയിരുന്നത്. അവിടെ ചിത്രം മാറ്റിയതായി അധികൃതര്‍ ഓണ്‍ലൈനിലൂടെ അറിയിക്കുകയും ചെയ്തു.


കോഴിത്തലയും ചുണ്ടില്‍ സിഗരറ്റും മടിയില്‍ ഷാംപെയ്‌നുമായാണ് എല്‍റോയുടെ പരസ്യത്തില്‍ ശിവന്‍ പ്രത്യക്ഷപ്പെട്ടിരുന്നത്. കൈയിലൊരു മൊബൈല്‍ ഫോണുമുണ്ടായിരുന്നു. ഒരു കണ്ണ് മൂടിക്കെട്ടിയ കടുവയുടെ പുറത്തിരിക്കുന്ന തരത്തിലായിരുന്നു ചിത്രീകരണം. ഫെബ്രുവരി 18നും 19നുമാണ് ആല്‍ബര്‍ട്ട് ഹാളില്‍ എല്‍റോ ബോളിവുഡ് പ്രമേയമാക്കി പാര്‍ട്ടി നടത്തുന്നത്.

എന്നാല്‍, ഓണ്‍ലൈനില്‍ പരസ്യം വന്നതോടെ തന്നെ ഇതിനെതിരെ ശക്തമായ വിമര്‍ശനമുയര്‍ന്നു. ഹിന്ദുക്കളെ വേദനിപ്പിക്കുന്നതാണ് എല്‍റോയുടെ പരസ്യമെന്ന് കിങ്‌സ് കോളേജ് ലണ്ടന്‍ ഹിന്ദു സൊസൈറ്റിയുടെ മുന്‍ പ്രസിഡന്റ് ഹിതേന്‍ മിസ്ട്രി പറഞ്ഞു. ആളുകള്‍ പുണ്യമെന്ന് കരുതുന്ന രൂപങ്ങളെ ഈ രീതിയില്‍ വികലമായി അവതരിപ്പിക്കുന്നത് വിശ്വാസികളെയാകെ അപമാനിക്കുന്നതിന് തുല്യമാണെന്നും അദ്ദേഹം അഭിപ്രായപ്പെട്ടു. പ്രതിഷേധങ്ങള്‍ പലഭാഗത്തുനിന്നും ഉയര്‍ന്നതോടെയാണ് എല്‍റോ ഖേദപ്രകടനം നടത്തി തടിതപ്പിയത്.